Konstrusaun edifísiu INL sei gasta rihun $700-resin
DILI, 05 janeiru 2024 (TATOLI) – Edifísiu foun Institutu Nasionál Linguístika (INL) sei konstrui, entre janeiru 2024 no janeiru 2025, ho montante osan ne’ebé Universidade Nasionál Timor Lorosa’e (UNTL) prevee ona mak rihun $700-resin. Ba konstrusaun edifísiu ne’e, ohin, UNTL lansa ona fatuk dahuluk ba obra refere.
Reitór UNTL, João Soares Martins, hatete INL merese hetan edifísiu foun ida hodi apoia sira halo serbisu, tanba instalasaun ne’ebé sira uza daudaun ne’e kuaze tinan 10-resin ona ne’ebe nia kondisaun ladún seguru atu prezerva obra sientífika sira ne’ebé maka sira prodús durante ne’e.
“Ita tau ona fundu rihun $700-resin hodi konstrui edifísiu andar ida kompleta ho ekipamentu sira, nune’e bele fasilita serbisu INL nian iha futuru ho di’ak liután”, reitór dehan iha lansamentu fatuk dahuluk ba edifísiu INL ne’ebé hala’o iha kampus Fakuldade Edukasaun, Arte no Umanidade (FEAH), iha Caicoli, ohin.
Nia salienta katak UNTL kontinua tau atensaun ba INL tanba iha papél ida importante tebes hahú husi mandatu diretór Benjamin Corte Real nian mai to’o diretora Rosa Tilman ne’ebé hatudu ona rezultadu hodi dezenvolve identidade nasaun Timor-Leste nian.
“Bainhira ita loke portál Governu nian kuaze hakerek tetun ho versaun ne’ebé maka INL prodús, entaun nu’udar UNTL ita tenke orgullu tanba instituisaun ida ne’ebé hetan kredensiál husi Governu bele dezenvolve ita-nian lian rasik atu futuru bele sai kompetitivu no sientífiku iha nasaun sudeste aziátiku no iha mundu”, afirma.
Dirijente ne’e salienta katak bainhira obra INL finaliza ona, dosente no estudante sira bele utiliza edifísiu ne’e ba atividade sientífika nian, liuliu semináriu nomós ba atividade peskiza liga ba kestaun língua tantu tetun komu lian materna liu 30-resin no lori papél INL nian bele dezenvolve liután língua sira ne’e.
Edifísiu ne’e sei kompleta ho auditóriu inklui sala aula sira no sei fó benefísiu ba INL rasik inklui FEAH tanba fakuldade ne’e ninia departamentu barak tebes, nune’e ba futuru INL bele dezenvolve ninia aan.
Ministru Ensinu Superiór, Siénsia no Kultura, José Honório Jerónimo, dehan katak UNTL aumenta tan pasu di’ak ida tanba tinan ida ne’e bele konstrui tan edifísiu foun ida ba INL.
“Ida ne’e maka polítika ensinu superiór públiku nian atu dezenvolve ninia aan. Ha’u kontente ita bele halo lansamentu fatuk dahuluk ba konstrusaun edifísiu INL nian. Ne’e importante tebes, nune’e ba futuru ita bele promove tetun no ita labele kahur ona tetun ho lian sira seluk”, espera.
Aleinde ne’e, Diretora INL, Rosa Tilman, agradese ba UNTL tanba konstrui ona edifísiu ida ba sira, nune’e bele dezenvolve instituisaun ne’e. “Espera katak INL sei dezenvolve aan hodi garante kualidade UNTL nian atu sai nafatin universidade publika ida ho progresu ne’ebé boot”.
Empreza konstrutura edifísiu INL mak joint venture Feto Kaduak no Dwipongo Bee Feto Tata.
Ministru José Honório husu ba empreza sira atu hatudu responsabilidade hodi kumpre tempu ne’ebé determina, tanba iha empreza balun bainhira seidauk hetan projetu hatudu sira-nian responsabilidade hodi manán konfiansa, maibé depois hetan tiha projetu la kumpre termu kontratu.
“Husu ba empreza manán-na’in sira atu labele abondona responsabilidae tanba projetu ne’ebé atu la’o daudaun ne’e instituisaun Estadu nian no uza osan povu nian. Tanba ne’e, responsavel kompañia nian tenke kontrola serbisu traballadór sira atubele serbisu ho efetividade hodi termina tuir tempu ne’ebé deside ona”, katak.
Diretór empreza Dwipongo Bee Feto, Dian Asmara Roesmana, garante katak durasaun obra ne’e mak tinan ida, maibé fulan haat de’it bele remata naran katak laiha impedimentu ruma husi mudansa klimátika.
“Hahú segunda, 08 janeiru, halo ona serbisu didin fatin konstrusaun nian. Alvu empreza nian fulan haat tenke remata tanba loja konstrusaun sira iha Timór mós barak maka fa’an materiál husi Indonézia. Tanba ne’e, materiál sira ne’ebé labele sosa iha Timór mak empreza sei bá hola iha Indonézia”, dehan.
Traballadór hamutuk 48 mak sei serbisu iha obra ne’e – na’in-10 husi Indonézia no 38 timoroan.
Notísia relevante: INL realiza semináriu kona-ba utilizasaun dalen Tetun liuhosi atividade hakerek
Jornalista: Tomé Amado
Editora: Maria Auxiliadora
