DILI, 26 setembru 2024 (TATOLI)—Konstrusaun edifísiu foun Institutu Nasionál Linguistiku (INL) iha Universidade Nasionál Timor-Lorosa’e (UNTL) foin mak atinje 24%.
“Progresu INL ne’e lentu, foin mak atinje 24%, loloos ne’e progresu tenke to’o ona 70% to’o 80%. La’o lentu tanba haree empreza halo serbisu la’o ladun másimu. Ita observa iha terrenu materiál mak tama tarde no iha loron 14 agostu konsege paradu to’o fulan-ida, depois mai halo enkontru ho sira no sira dehan materiál mak laiha, maibé bainhira iha loron 18 setembru ne’e ami simu fali karta katak sira hahú fali ona,” Pro-Reitór ba Asuntu Dezenvolvimentu Instituisionál iha UNTL, Lelis Gonzaga Fraga, hateten, iha ninia knaar fatin, UNTL sentrál, kinta ne’e.
Nia dehan, bainhira materiál tama ona maka serbisu mós bele la’o, nune’e espera semana ne’e bele iha progresu di’ak.“Ba oin la’o oinsá ne’e parte aprovizionamentu mak hatene katak kontinua ka para. Tanba iha regra mós ba sira no ita hakarak obra ne’e tenke finaliza tuir tempu determina,” nia akresenta.
Notísia relevante : Projetu konstrusaun edifísiu foun INL iha UNTL atinje 22%
Konstrusaun edifísiu foun INTL hahú iha janeiru 2024 no tuir planu sei konklui iha janeiru 2025. UNTL prevee kustu $700.000-resin ba projetu ne’e.Antes ne’e, Reitór UNTL, João Soares Martins, hateten, INL merese hetan edifísiu foun ida hodi apoia funsionáriu sira halo serbisu tanba edifísiu ne’ebé iha eziste ona desde tinan 10-resin ona, ne’ebé nia kondisaun ladún seguru atu prezerva obra sientífika sira ne’ebé maka sira prodús durante ne’e.”Ita tau ona fundu $700.000-resin hodi konstrui edifísiu andar ida kompleta ho ekipamentu sira, nune’e bele fasilita serbisu INL iha futuru ho di’ak liután,” Reitór tenik.
Tezoreiru Projetu QHSE, PT. Dwiponggo Seto Bee Feto Kaduak, PT. Tata Raya Kharisma (JV), Viodea Ramadhaniar, informa, materiál konstrusaun tama tarde tanba importa hotu husi Indonézia.
“Kestaun mak molok kee pondasi tun ba rai okos ne’e metru tolu, entaun ita labele kontinua no hein bee tun mak foin kontinua fali. Kestaun seluk mak materiál sira importa husi Indonézia hotu no fulan ne’e nia laran feriadu barak. Ida-ne’e sai fallansu ida ba ami,” nia katak.
Reprezentante empreza ne’e rasik la garante katak projetu ne’e bele finaliza tuir tempu, tanba progresu serbisu la’o neneik, nune’e hein UNTL nia desizaun kona-ba prolonga serbisu ka hapara kontratu serbisu.
Jornalista : Osória Marques
Editora : Julia Chatarina
