COVALIMA, 31 janeiru 2025 (TATOLI)- Sekretáriu Estadu Arte no Kultura, Jorge Soares Cristovão, sesta ne’e, entrega termu entrega atu halo jestaun ba Sentru Soru Tais iha aldeia Loo, Suku Suai Loro, postu Suai, ba Autoridade Covalima.
“SEAK servisu hamutuk grupu rede soru-na’in ho parseiru sira ita bele estabelese sentru ba rede soru-na’in sira atu halo sira-nia atividade no loke mós loja soru-na’in,” Governante ne’e informa ba jornalista sira hafoin observa kondisaun sentru soru Tais, iha Suai Loro, ohin.
Ho nune’e obra ne’ebé mak durante iha grupu soru-na’in prodús fatin ne’e, sai sentru konsentrasaun ba sira-nia obra tanba Tais hanesan identidade Timor ne’ebé mak rejista ona sai hanesan patrimóniu mundiál.
“Ita haree kondisaun sentru soru Tais di’ak maibé presiza atu hadi’a tanba udan-been sei tama, ita sei servisu hamutuk ho ita-nia parseiru sira atu aselera,” nia dehan.
Governante ne’e mós fó hanoin ba autoridade Covalima atu tau atensaun nune’e grupu rede soru-na’in hala’o atividade bele la’o ho hakmatek nune’e ema hotu bele koñese sentru Soru Tais.
Tuir dadus grupu Soru-na’in iha Covalima hamutuk 200-resin. Iha sentru soru Tais ne’e sira atu konsentra sira-nia atividade komersiál no sai fatin formasaun Dezenvolvimentu Tais rasik.
Iha oportunidade ne’e, Reprezentante Prezidente Autoridade Covalima, Filomeno Cardoso mós fó hanoin ba grupu soru-nain sira presiza atu kuda kabas nune’e bele prodús Tais.
“Ha’u hanoin ita-boot sira (Soru-na’in) mak bele iha koñesementu di’ak maibé presiza submete proposta tanba dala ruma balun hakarak de’it osan nune’e Sosa fali Tais husi munisípiu seluk. Maibé, ita promove ita-nia Tais rasik”, nia fó hanoin.
Xefe Grupu Fitun Naroman, Santina de Jesus, informa katak, maske entrega ona maibé seidauk bele uza, tanba haree ba kondisaun uma no la iha seguransa, tanba ne’e presiza atu haree kondisaun sira ne’e.
“Ohin halo ona termu entrega ami prontu atu hala’o ami-nia atividade soru Tais hodi promove ita-nia identidade liuhusi Tais,” nia kompromete.
Fó hanoin fali katak Sentru Soru Tais iha Aldeia Loo suku Suai Loro inaugura husi eis Ministru Komérsiu no Indústria iha loron 25fevereiru 2023.
Jornalista: Celestina Teles
Editór: Rafael Ximenes de A. Belo
