KOVALIMA, 13 fevereiru 2025 (TATOLI) – Institutu Nasionál Estatístika Timor-Leste, Institutu Públiku (INETL,I.P) Munisípiu Kovalima, daudaun-ne’e kontinua hala’o atividade rejistu dadus populasaun iha Kovalima.
Xefe Servisu Estatístika Munisípiu Kovalima, Fernando Ferreira, esplika, atividade rejistu dadus populasaun ne’e ho objetivu atu hatene dadus populasaun; fertilidade, mortalidade no migrasaun iha munisípiu Kovalima.
“Ita halo rejistu dadus populasaun sira ne’e, maibé seidauk iha rezultadu tanba prosesu rejistu ba périodu daruak mós seidauk finaliza, hafoin finaliza mak foin bele fó sai rezultadu”, Fernando Perreira relata dadus ne’e ba TATOLI, iha nia servisu fatin Tabakolot, ohin.
Xefe ne’e dehan, prosesu rejistu populasaun seidauk fó sai rezultadu ba faze dahuluk ne’ebé hahú rejistu iha 01 janeiru to’o 30 juñu 2024 no périodu ba daruak hahú rejistu loron 01 jullu to’o 31 dezembru 2024 ne’ebé seidauk finaliza no kontinua halo rejistu.
“Ita rekolla data fertilidade, mortalidade no migrasaun. Ita fahe internál ho esternál. Migrasaun internál ne’e sirkulasaun populasaun halo mudansa iha territóriu Timor, migrasaun esternál; sirkulasaun populasaun ita-nian ho estranjeiru”, nia informa.
Durante halo rejistu seidauk hatene dadus tanba dadus seidauk kompletu nune’e kontinua rekolla ba périodu daruak. Hafoin finaliza rejistu, sei halo analiza no foin bele fó sai nia rezultadu analiza.
Prosesu rekolla dadus seidauk finaliza tanba hasoru difikuldade mudansa estrutura lideransa lokál, menus rekursu umanu, transporte; motorizada rua de’it.
Tuir dadus, totál funsionáriu ne’ebé daudaun-ne’e presta sira-nia servisu iha INETL,I.P munisípiu Kovalima hamutuk na’in lima husi numeru ne’e inklui ho xefe INETL,I.P
“Ho difikuldade ne’ebé ami iha, maibé ami nafatin lalakon vontade no nafatin esforsu hodi hala’o ami servisu hodi rekolla dadus iha postu hitu, suku 30 no aldeia 148 pertense ba Kovalima”, nia esplika.
Jornalista:Celestina Teles
Editór :Rafael Ximenes de A. Belo
