DILI, 24 Fevereiru 2025 (TATOLI) – Embaixadora Hungria naun rezidente, Lilla Karsay hasoru malu ho Primeiru-Ministru (PM) timorense, Xanana Gusmão, hodi ko’alia kona-ba kooperasaun bilaterál no preparasaun ba estabelesimentu, iha tinan oin, konsuladu onoráriu Hungria nian iha Timor-Leste.
“Ohin, primeira vez ha’u hasoru malu ho primeiru-ministru. Iha enkontru ami halo diskusaun foka ba pontu importante sira hanesan kooperasaun entre nasaun rua no ita mós hahú ona preprasaun tinan ne’e la’e tinan oin estabelese konsuladu onoráriu iha Timor-Leste. Ha’u sente ida-ne’e atu hametin relasaun diplomata nian”, Lilla Karsay hateten iha Palásiu Governu.
Aleinde ne’e iha sorumutu ne’e ko’alia mós kona-ba Timor-Leste nia adezaun ba Asosiasaun Nasaun Sudeste Aziátiku (ASEAN, sigla inglés).
“Hungria mós sei prepara programa bolsa estudu, ba Timor-Leste, tanba Timor Leste iha ona ASEAN nia okos. Ami sei haree kualkér estudante Timor-Leste hira mak presiza bá estuda iha tinan balun iha universidade nasaun Hungria”, Lilla Karsay adianta.
Nia mós informa ba xefe Governu katak Hungria mós iha programa umanitáriu, ne’ebé bele apoia komunidade kristaun sira iha mundu hanesan hadi’a eskola, ospitál, nomós bele haree oportunidade saida mak presiza halo iha Timor-Leste.
“Maske ho projetu sira ne’e eskala ki’ik, maibé ami fiar ida-ne’e bele sai inísiu di’ak tebes atu hahú kualkér kooperasaun”, diplomata ne’e subliña.
Jornalista: Arminda Fonseca
Editora: Maria Auxiliadora
