DILI, 25 Fevereiru 2025 (TATOLI)-Diretór Nasionál Rekursu Umanu iha Ministériu Edukasaun (ME), João Amaral, hatete ME retroativu ona kargu xefia sesante no Ensinu Sekundáriu sira iha territóriu.
“Ita halo ona pagamentu ba kargu xefia sira hosi Dili, Ainaru ho Ataúru inklui mós ba Ensinu Sekundáriu no Ensinu Tékniku Vokasionál iha territóriu. Ohin ha’u mós asina kargu xefia sesante sira hosi munisípiu rua hanesan Kovalima ho Bobonaru, no tempu badak sei halo pagamentu tan”, nia dehan iha nia knaar fatin Vilaverde, ohin.
Munisípiu Ainaru profesór hamutuk 86, ho nia osan $235.657; Dili iha na’in 65 ho nia montante orsamentu $165.156; Ataúru iha na’in neen ho osan $19.905.
“Pagamentu ne’e hahú hosi Juñu 2023-Maiu 2024 nian, ne’ebé nia orsamentu ba kargu xefia sira-ne’e totál $869.982,60. Agora kona-ba kargu xefia hosi Bobanaru ho Kovalima ne’e ita seidauk bele fó nia orsamentu tanba sei iha prosesu análiza, bainhira ita define ona nia osan totál mak foin bele fó sai”, dehan.
Antes ne’e ME iha tinan 2023 liubá halo ona pagamentu ba kargu xefia hamutuk 1.927 iha territóriu nasionál, neʼebé númeru ne’e maihusi munisípiu Aileu 133, Ainaru 14, Baukau 459, Bobonaru 71, Kovalima 326, Dili 244, Ermera 16, Likisá 18, Lautein iha 270, Manatutu 161, Manufahi 59 no Vikeke 156.
Enkuantu, iha tinan 2022 halo ona pagamentu hamutuk 2.306, kompostu husi munisípiu Aileu 98, Ainaru 151, Baukau 380, Bobonaru 115, Kovalima 73, Dili 306, Ermera 47, Likisá 518, Lautein 308, Manatutu 94, Manufahi 113 no Vikeke 103.
Notísia relevante:Pagamentu retroativu ba profesór 1.715 realiza entre agostu no setembru
Jornalista : Osória Marques
Editora : Rita Almeida
