DILI, 26 Fevereiru 2025 (TATOLI) – Timor GAP, Empreza Públika no kompañia Eni Timor, subsidiária husi Eni International asina akordu Sesaun no Aseitasaun ba Partisipasaun Estadu nian iha Operasaun Petrolífera iha ámbitu Kontratu Fahe Produsaun ba Área Kontratu PSC-TL-SO-22-23, ne’ebé lokaliza iha área juridisaun marítima Timor-Leste nian no besik kampu Greater Sunrise.
Tuir akordu ida-ne’e, no relasiona ho direitu partisipasaun Estadu nian tuir Lei Timor-Leste nian, atribui ba Timor GAP interese partisipasaun ho 12.5% iha CPP TL-SO-22-23.
“Partisipasaun empreza estatál iha indústria bazeia ba Lei Atividade Petrolífera no akordu ne’e formaliza partipasaun ho porsentu 12.5 ba área ne’ebé operadór ENI konfirma ona ninia potensialidade, hodi dezenvolve no halo produsaun iha futuru”, Prezidente Timor GAP, E.P., Rui Soares hateten iha komunikadu ne’ebé Tatoli sita, ohin.
Dirijente empreza estatál ne’e dehan ANP, I.P. autoriza ona ENI hodi bele halo preparasaun ba peskiza sízmiku iha offshore, iha kuarta trimestre 2025 durante fulan tolu nia laran.
“ENI loke hela konkursu ba ró ne’ebé sei apoia realizasaun sízmiku 2D no 3D no garante katak, perfurasaun sei realiza iha finál 2026, ho esperansa katak, mina no gás sei komersialmente viavel, hodi benefisia ba entidade ne’ebé envolvidu iha prosesu ne’e”.
Prezidente Autoridade Nasionál Petróleu, Gualdino do Carmo da Silva, dehan kompromisu husi Governu, rejime kontratasaun no maneira administrasaun ba rekursu, fó serteza no estabilidade ba investór sira, atu halo parseria no investe iha Timor-Leste iha área petróleu no gás.
Iha sorin seluk, Ministru Petróleu no Rekursu Minerál, Francisco Monteiro, dehan Governu iha polítika ida ne’ebé klaru hodi garante partisipasaun másima husi empreza estatál iha dezenvolvimentu rekursu naturál.
Tuir governante ne’e, asina akordu entre Timor GAP, E.P no ENI nu’udar “pasu konkretu ida iha ezekusaun polítika ida-ne’e no ita hein katak entidade rua ne’e implementa kompromisu ne’e ho efetivu”.
Nia salienta katak ENI nia investimentu no desizaun atu aloka orsamentu ba peskiza no esplorasaun sízmika sai nu’udar sinál klaru husi konfiansa iha kapasidade Timor-Leste nian atu dezenvolve ninia setór enerjétiku no hasa’e ekonomia nasionál.
Kontratu Fahe Produsaun TL-SO-22-23 ne’e asina ona entre ANP no Eni iha loron 14 Dezembru 2023. Área kontratu, ne’ebé uluk koñesidu ho naran Bloku P, lokaliza iha kosta súl Tasi Timor-Leste nian, entre kampu gás Greater Sunrise iha parte norte no kampu gás Chuditch nian iha parte súl. Bloku ida-ne’e entre Bloku 18 ne’ebé Governu Timor-Leste loke liuhusi Ronda Daruak Lisensiamentu Timor-Leste nian 2019/2022.
Tuir Kontratu Fahe Produsaun ida-ne’e, Eni ho nia parseiru Joint Venture ne’ebé foin harii, Timor GAP, iha kompromisu ba programa serbisu ativu ida ne’ebé inklui atividade sízmika no perfurasaun.
TATOLI
