VIKEKE, 10 Marsu 2025 (TATOLI)—Implementasaun Projetu Planu Dezenvolvimentu Investimentu Munisipál (PDIM) haat iha Viqueque liuhusi Orsamentu Jerál Estadu (OJE) ba tinan 2024 ninia implementasaun daudaun ne’e hetan progresu fíziku atuál atinje ona 81.39%.
Projetu haat ne’e kompostu husi konstrusaun edifísiu Sekretáriu Estadu Formasaun Profesionál no Empregu (SEFOPE), edifísiu Ensinu Báziku Filiál (EBF) Uaimori sala neen, Edifísiu Ensinu Báziku Sentrál (EBC, sigla portugés) 01 Vikeke Vila hamutuk sala neen no loke estrada liga ba fatin lixu besik kilómetru ida.
“Projetu haat ne’e orsamentu husi kapitál dezenvolvimentu ne’ebé ita implementa iha Vikeke, maioria ita-nia emprezáriu responsavél sira ezekuta servisu ho di’ak, tanba progresu hatudu katak atinjimentu fíziku emjerál sa’e ba 81.39%, edifísiu tolu taka kalen ona no pinta ona,” Diretór PDIM munisípiu Vikeke, Joaquim Fernandes, hateten ba TATOLI, iha nia kna’ar fatin, administrasaun munisípiu Vikeke, ohin.
Diretór PDIM Vikeke ne’e dehan, prosesu konstrusaun projetu haat ne’ebé agora la’o tékniku PDIM mak akompaña hodi aselera prosesu servisu no halo kontrolu servisu hodi garante ba kualidade projetu referidu
“Ba servisu ne’e ami mós sempre fó korajen no motivasaun ba ita-nia empreza sira, atu garante ba kualidade konstrusaun nomós ami fó hanoin ba sira oinsá atu aselera projetu sira-ne’e hodi finaliza,” nia fó hanoin.
Aleinde ne’e, nia husu empreza implementadór sira mantein implementa servisu bázeia ba dezeñu Planta no Kadernu Enkargu ka Bill of Quantity (BoQ) husi PDIM Vikeke.
“Projetu haat ne’e kada loron-loron ita-nia tékniku PDIM sira presenza, iha fatin konstrusaun sira hodi fó hanoin ba empreza sira atu halo tuir dezeñu, atu prosesu konstrusaun labele sees husi dezeñu ne’ebé ita prepara. Ne’ebé ita-nia empreza sira kolabora di’ak ho ami,” nia dehan.
Tuir nia, projetu haat ne’e implementa iha postu Vikeke Vila, hahú konstrusaun iha loron 18, fulan-Jullu 2024 no ramata loron 31 fulan-Dezembru 2024, maibé la konsege ramata ne’e projetu haat nee tama ba reapropriasaun nune’e projetu haat ne’e ramata iha tinan 2025.
Tuir dadús husi PDIM ba progresu fíziku kada projetu haat mak hanesan konstrusaun edifísiu SEFOPE no morru protesaun atinji 73.38%, konstrui husi empreza Sovilhosna Unipesoál, Lda, ho kustu konstrusaun hamutuk $258,680.21.
Nune’e, edifísiu Ensinu Báziku Filiál (EBF) Uaimori sala neen atinje 93.25% gasta orsamentu hamutuk $175, 514,96 husi empreza Carnesia Rekordasaun Unipesoál, Lda.
Iha edifísiu Ensinu Báziku Sentrál (EBC, sigla portugés) 01 Vikeke Vila sala neen atinje 96.38% ne’e gasta orsamentu hamutuk $237,861.84 ne’ebé konstrui husi empreza Makbes Liu Unipesoál, Lda.
Loke estrada liga ba fatin lixu besik kilo ida, prosesu loke dalan, ateru no baleta, atinje 62.38% gasta orsamentu hamutuk $237,861.84 konstriu husi empreza Tres Iramãos Unipesoál, Lda.
Jornalista : Vitorino Lopes da Costa
Editór : Cancio Ximenes
