DILI, 11 Marsu 2025 (TATOLI)—Vise-Ministru ba asuntu Parlamentár, Adérito Hugo da Costa, hateten, Governu halo apresiasaun ba pedidu atu transforma East Timor Coffee Institute (ETCI) iha Glenu, Ermera sai eskola públika.
“Hakarak adianta antesipadamente kona-ba progresu pedidu ne’e, até nível Governu iha oportunidade halo apresiasaun liuhusi Konsellu Ministru no orientasaun direta husi Primeriu-Ministru ba Ministru Ensinu Superiór Siénsia no Kultura atu fó kontinuasaun kontaktu ho fundadór ka asionista ETCI,” Governante ne’e responde ba Deputadu sira liuhusi reuniaun plenária, Parlamentu Nasionál (PN), tersa ne’e.
Nia dehan, ekipa daudaun ne’e kontinua halo diskusaun ho fundasaun husi ETCI hodi bele iha solusaun.
Iha orientasaun Primeiru-Ministru ba Ministru Ensinu Superiór Siénsia no Kultura atu halo diskusaun detallu kona-ba polítika dezenvolvimentu iha institutu ne’e foka estudu espesífiku indústria ka plantasaun kafé iha futuru sai institutu públiku ne’ebé bele konsentra ba dezenvolvimentu setór kafé iha rai-laran.
Notísia relevante : ETCI hakarak halo peskiza kona-ba produsaun kafé Timór
Deputadu Bankada Governu husi Kongresu Nasionál Rekonstrusaun Timorense (CNRT), Marcos Soares Martins, husu ba ministériu tutela atu konsidera pedidu husi fundasaun ETCI ne’ebé hato’o ba Governu atu transforma eskola privada ne’e ba fali eskola públika.
“Hakarak transmite filafali ba Ministru Ensinu Superiór Siénsia no Kultura atu fó resposta pozitiva ba komunidade akadémika munisípiu Ermera kona-ba eskola ETCI, relativamente proposta transformasaun eskola privada ba eskola públika,” nia hato’o.
Reprezentante povu ne’e hateten, liga ba pedidu ka proposta ne’ebé fundasaun entrega ba parte komunidade, hein katak bele fó resposta pozitiva.
“Ita iha esperansa iha futuru eskola ne’e bele prodús jerasaun ho kualidade ba nasaun,” nia akresenta.
ETCI hanesan institutu ida no fatin prosesamentu kafé ne’ebé fó biban ba estudante sira hodi bele loke mikro empreza bainhira ramata estudu ho sira ninia aproveitamentu.
Nune’e, bainhira estudante sira ramata estudu iha ona parseiru husi tékniku vokasionál maka bele serbisu hamutuk tanba konsidera iha área agrikultura seidauk iha industria ne’ebé kompativel atu estudante sira bele asesu ba merkadu no kompete.
Tanba ne’e, estudante sira tenke kria rasik grupu kiik (mikro empreza) ba negósiu hanesan kafé, nune’e bainhira sira buka serbisu maka laiha ona bele kria rasik grupu hodi bele hasa’e kualidade kafé.
ETCI iha tinan 2012 foin hetan akreditasaun institusionál husi Ministériu Edukasaun Ensinu Superiór, hafoin harii iha tinan 2003 hanesan Akadémiku Agrikultura no hetan avaliasaun husi ministériu iha tinan 2009.
Bainhira institutu ne’e harii dahuluk, hahú ho fakuldade agrikultura de’it, hafoin iha tinan 2009 to’o 2012 iha hanoin atu koko fakuldade edukasaun no ekonomia kontabilidade, nune’e to’o tinan 2019 iha ona fakuldade tolu no departementu 10.
Iha área agrikultura, la’ós prodús matéria de’it maibé implementa teoria pursentu 40 no prátika pursentu 60.
Dosente iha institutu ne’e hamutuk 32 maka permanente no totál ne’ebé akumula ho dosente kontratadu 78.
Enkuantu, estudante sira ne’ebé rejista kada tinan iha institutu ne’e maka entre 150 to’o 300.
Jornalista : Nelson de Sousa
Editora : Julia Chatarina
