KOVALIMA, 12 Marsu 2025 (TATOLI) – Sentru solidariedade sosiál no inkluzaun (SSSI) munisípiu Kovalima liuhusi Diretór sentru solidadiedade sosiál no inkluzaun, kuarta ne’e, aprezenta implementasaun programa prioridade ba delegasaun Benazir Income Support Program (BISP) Pakistan, UNWFP.
“Ha’u dehan sentru solidariedade sosiál implementa polítika Ministériu hodi implementa programa sira Bolsa da mãe, asisténsia umanitáriu, asuntu defisiénsia no seluk”, Agapito Assis Cardoso, aprezenta ba delegasaun BISP, iha salaun AMC, ohin.
Programa Bolsa da Mãe oinsá atu tulun família vulneravél ne’ebé nia oan na’in tolu ho problema sosiál atu asesu subsídiu husi Ministériu solidariedade sosiál no inkluzaun (MSSI) ne’ebé nia benefisáriu hamutuk 2,771 ne’ebé mai husi autoridade sira .
Durante implementa progama Bolsa da mãe, nia dehan, hasoru dezafiu benefisiáriu sira la iha dokumentu komprovativu balun sai difikuldade tanba atu asesu Bolsa da mãe presiza kompleta rekezitu sira.
Governu mós fó subsidísiu ba idozu no invalidés ne’ebé mai husi postu administrativu hitu husi munisípiu Kovalima, benefisáriu hamutuk 7.053.
Dadus idozu invalidés 7.053 mai husi postu Fatululik benefisiáriu hamutuk 239, Fatumea 487, Fohorem 579, Maukatar 1068, Tilomar 821, Suai 2085 no Zumalai 821 maibé nafatin halo atendimentu ba sidadaun ne’ebé mak foin kumpleta idade 60 ba leten hodi halo rejista.
Implementasaun programa, MSSI fó asisténsia umanitária ne’e halo distribuisaun foos ba grupu vulneravel no família vulneravel hamutuk 2,143 .
Programa asiténsia umanitáriu distribui foos ba Instituisaun Uma Mahon Salele, Hornisi Maukatar, Koléjiu Kanosiana Suai, Koléjiu Kanosiana Fohorem, Komunidade padre Fohorem Klaret Salele, Pradet Fokupers, VPU, KDESTO no Asrama Mãe Misericordia foos saka 171.
Apoiu ba família vulneravel foos saka 113, ema ho difisiénsia 315,vítima vulneravel saka 16, eis-prizineiru saka 11, apoiu ba vítima dezastre naturál saka 216 no apoiu ba outru grupu 277.
Bazeia ba ajenda ne’ebé TATOLI asesu, aprezentasaun ba ekipa delegasaun husi Benazir Income Support Program Pakistan (BISP), UNWFP, objetivu halo estudu viabilidade kona-ba prosesu no mekanizmu ne’ebé presiza relasiona ho estabelesimentu sistema rejistu sosiál
Rezultadu espetativa husi vizita ba estudu viabilidade ne’e maka fornese informasaun detalla kona-ba rekerimentu prinsipál sira hodi estabelese sistema rejistu sosiál inklui kustu no rekursu umanu ba sistema rejistu sosiál.
Aleinde ne’e, estabelese no kria parseria serbisu tékniku entre Governu Timor-Leste no Governu Pakistaun relasiona ho Programa protesaun sosiál ne’ebé sensitivu ba nutrisaun, liuliu ba grupu vulneravel sira.
Jornalista: Celestina Teles
Editór: Rafael Ximenes de A. Belo
