DILI, 13 Marsu 2025 (TATOLI)—Governu liuhusi Ministra Saúde (MS), Elia A. A. dos Reis Amaral, kinta ne’e, entrega karreta ambulánsia ida ba Prezidénsia Repúblika hodi destaka iha klínika ne’ebé instala iha Palásiu Prezidensiál atu fasilita tratamentu saúde bá funsionáriu sira inklui populasaun ne’ebé hela besik palásiu ne’e.
Serimónia entrega ne’e, asiste direta hosi Prezidente Repúblika, José Ramos Horta, no Primeiru-Ministru (PM), Kay Rala Xanana Gusmão.
Prezidente Repúblika, José Ramos Horta, hateten nasaun barak iha mundu iha klínika Prezidensiál ne’ebé iha mós servisu médiku iha Prezidénsia Repúblika, tanba ne’e klínika no ambulánsia ne’e fó apoiu ba funsionáriu, família no populasaun mós bele halo tratamentu saúde iha klínika ne’e.
“Rai barak iha mundu, servisu Ptrezidénsia nian, iha klínika fó apoiu ba funsionáriu sira hotu. Ezemplu, ha’u kuandu ba vizita iha rai-li’ur liuliu Indonézia de’it bainhira ha’u ba tranzit de’it maibé iha li’ur Ambulansia ida para hein hela. Ba ne’ebé de’it, iha Portugál, karreta ambulánsia ida tenke tuir, ida ne’e hatudu ema sira nia responsabilidade. Maibé, ita-nian laiha, ha’u rasik mak la liga buat sira-ne’e maibé dalaruma situasaun derrepente bele presiza,” Ramos Horta hateten iha Palásiu Prezidensiál Nicolau Lobato, Dili, kinta ne’e.
Klínika ne’e kompleta ho ekipamentu modernu no bele sai hanesan ezemplu ida kona-bá buat ne’ebé Estadu ho Governu bele halo iha rai-ne’e, no klínika ne’e hetan apoiu tékniku mai-husi Ministériu Saúde mak hanesan ekipamentu no medikamentu.
Daudaun ne’e, iha médiku Kubanu na’in-rua (2) mak hala’o asisténsia ne’ebé hetan apoiu husi Enfermeira timoroan balun.
Jornalista : Hortencio Sanchez
Editór : Cancio Ximenes
