DILI, 13 marsu 2025 (TATOLI)—Governu Timor-Leste fó apoiu osan ho montante $500.000 ba São Tomé e Príncipe atu tulun sira selu divida.
“Ita hatene, São Tomé e Príncipe rai kiikoan rua, furak atu mate, maibé sira laiha kbiit, ne’ebé ita fó apoiu ona tanba sira mak kaer hela Prezidensia ba CPLP. Foin lalais, sira hala’o atividade, ita fó apoiu uitoan, iha momentu ne’ebá nasaun CPLP sira ba hotu iha ne’ebá ne’e kala sira iha divida ruma karik mak sira nia Primeiru-Ministru hakarak mai atu husu apoiu. Ne’ebé, ita fó ba Angola nasaun riku ne’e labele,” Primeiru-Ministru, Kay Rala Xanana Gusmão, hateten ba jornalista sira iha Palásiu Prezidensiál Nicolau Lobato, Bairru Pite, kinta ne’e.
Kona-ba asuntu ne’e, iha loron 12 Marsu 2025, Konsellu Ministru aprova projetu Rezolusaun Governu, ne’ebé aprezenta husi Primeiru-Ministru, Kay Rala Xanana Gusmão, relasiona ho donativu ba Repúblika Demokrátika São Tomé e Príncipe ho valór $500.000, hodi apoia kustu ne’ebé mosu tanba Prezidénsia Rotativa CPLP.
Relasaun TL-São Tome e Principe
Antes ne’e, iha 29 Agostu 2023, Ministru Negósiu Estranjeiru no Kooperasaun (MNEK), Bendito dos Santos Freitas, halo enkontru kortezia ho nia omólogu Ministru Negósiu Estranjeiru (MNE) São Tomé e Príncipe, Garety Guadalupe, hodi aborda kona-ba futura kooperasaun entre nasaun rua iha área formasaun profisionál, diplomasia no seluk tan.
Enkontru ne’ebé hala’o iha edifísiu MNE São Tomé e Príncipe ne’e, akompaña husi Xefe Misaun Permanente Junta CPLP, Embaixadora Marina Ribeiro Alkatiri.
Bendito Freitas hateten, enkontru ne’e importante tebes tanba fortalese liután kooperasaun entre nasaun rua nian iha área diplomasia.
Posibilidade kooperasaun iha área formasaun profisionál, formasaun iha área diplomasia, relasaun internasionál no dala ruma mós asisténsia téknika, ne’ebé bele apoiu ministériu iha Timor no área balun liuliu São Tomé hakarak tebes apoia Timor-Leste.
Nune’e, ekipa téknika husi nasaun rua ne’e, presiza tuur hamutuk atu diskute programa prioridade ne’ebé atu hahú, bazeia mós ba tema husi Konferénsia CPLP kona-ba “Juventude Sustentabilidade”.
Jornalista : Hortencio Sanchez
Editór : Cancio Ximenes
