VIKEKE, 14 Marsu 2025 (TATOLI)—Abitante uma kain 50 hela iha área pemancar aldeia Cabira-oan, suku Caraubalu, postu Vikeke Vila, munisípiu Vikeke durante fulan neen ona la asesu ba bee-moos.
Komunidade aldeia Kabira-oan, Lorenço dos Reis, hakuir komunidade hela área Pemancar ne’e hahú la asesu ba bee-moos fulan-Outubru 2024 to’o Marsu 2025 la asesu ba bee-moos, atu asesu ba bee-moos tenke kuru iha mota no iha rezidénsia Prezidente Autoridade munisípiu Vikeke nian.
“Ami hela iha área ida-ne’e difikulta liu ba bee-moos, ami atu asesu ba bee-moos ami tenke ba mota Kaenlulik distánsia kilo ida no ba PAM nian rezidénsia distánsia 200 metru mak foin kuru bee hodi uza ba nesesidade loron nian,” Lourenço dos Reis hateten ba jornalista sira, liuhusi konferénsia imprensa iha aldeia Cabira-oan, ohin.
Lorença dehan, komunidade sira enfrenta liu ba bee-moos dadersan estudante sira haris atu ba eskola mós difisiu liu, ténke ba mota mak foin haris.
“Fasilidade bee-moos nian mai ami-nia bairru pemansar ne’e iha, maibé bee mak la mai to’o iha ami-nia fatin. Tan ne’e ami husu ba servisu Bee Timor-Leste, empreza públika (BTL, E.P) mai haree ami-nia difikuldade sira-ne’e,” nia dehan.
Nia argumenta, BTL, E.P preisza tau ba atensaun atu komunidade bele asesu fila-fali ba bee-moos, monta kontradór bee-nian atu selu mós komunidade prontu kontribui.
“Importante bee mai ami-nia fatin hodi ami asesu, selu mós ami prontu hodi selu ba BTL, E.P, tanba ami terus liu ona ba bee-moos,” nia dehan.
Iha fatin seluk, xefe suku Caraubalu, João Pinto, rekoñese komubidade área pemancar durante ne’e preokupa liu ba bee-moos, nune’e autoridade relata ona ba parte relevante hodi tau ba konsiderasaun.
“Ita-nia komunidade hela iha pemancar ne’e sira la asesu bee-moos ne’e kleur ona, ne’ebé hato’o ona ba parte kompetente sira hodi haree asuntu referidu,” nia dehan.
Hatán ba preokupasaun ne’e, Koordenadór BTL, E.P munisípiu Vikeke, Marito da Costa, hateten komunidade iha pemancar bee la sa’e ba komunidade nia fatin tanba ema balun mak tesi kotu kanu iha rezidénsia PAM nian.
“Tanba ne’e mak bee to’o agora labele suli ba komunidade iha área pemancar hodi asesu. Nune’e, daudaun ne’e tékniku BTL, E.P ba halo ona observa ba kanu ne’ebé kotu iha rezidénsia PAM nian, hodi rezolve komunidade nia problema sira-ne’e,” nuia dehan.
Tuir dadus, komunidade hela iha área pemancar totál uma-kain 50 ho totál abitante 200 ne’ebé daudaun ne’e enfrenta ba bee-moos.
Jornalista : Vitorino Lopes da Costa
Editór : Cancio Ximenes
