DILI, 15 Marsu 2025 (TATOLI)—Grupu Foinsa’e Muachau Tutuala, sábadu ne’e, iha salaun Instituto of Business (IOB), Praia dos Coqueiros, realiza talk show no espozisaun ho tema ‘Hanoin hikas Saudozu Komandante Nino Konis Santana nia dedikasaun tomak ba indepedénsia rai doben Timor-Leste’.
Notísia relevante: https://tatoli.tl/2024/03/11/hanoin-hikas-loron-falesimentu-komandante-nino-konis-santana/
Koordenadór Grupu Foinsa’e Muachau Tutuala, José dos Santos, hateten objetivu husi eventu ne’e atu selebra Saudozu Nino Konis Santana nia loron mate iha 11 Marsu 1998, ne’ebé ohin loron kompleta ona tinan 27.
“Inisiativa ne’e Grupu Foinsa’e Tutuala hakarak hakle’an liután istória loloos husi Saudozu nian no mós enkoraja foinsa’e sira hotu hatutan istória inspirasaun iha moris loron-loron liuhusi asaun pozitivu sira atu kontribui ba komunidade,” nia hato’o.
Iha eventu ne’e, hala’o atividade prinsipál rua hanesan talk show ne’ebé konvida oradór na’in haat hodi ko’alia pasu pozitivu sira inklui istória loloos Saudozu nian no ko’alia foka relevante ho dezenvolvimentu nasaun nian.
Atividade seluk, espozisaun, iha-ne’ebé hatudu fotografia no vídeo ne’ebé durante Saudozu hala’o iha tempu rezisténsa hasoru inimigu. Eventu ne’e hetan partisipasaun másima husi membru Grupu Foinsa’e Tutuala, grupu voluntáriu RYLA, universitáriu ho grupu voluntáriu seluk tan.
Atividade hirak-ne’e realiza tanba hetan tulun husi Fundasaun Memória Konis Santana, CAMSTL, Daya Marketing, IOB ho parseiru seluk tan.
Iha fatin hanesan, Prezidente Fundasaun Memória Konis Santana, Izaldes Santana, hateten husi istória hanorin mai timoroan atu hadomi rai ida-ne’e tanba ho rai ida-ne’e nia ukun aan timoroan bele sente nia benefísiu to’o ohin loron.
“Bainhira ita hatene istória mak ita bele hateke bá-oin hodi hadi’a ita-nia istória moruk sira iha pasadu ba Timor nia di’ak,” nia haktuir.
“Iha hasoru malu ida-ne’e, ha’u konta ba maun katak kolega joven na’in rua hakarak ba Inglaterra. Bainhira rona liafuan ida-ne’e, maun Konis nia mensajen ba ha’u mak joven sira labele sees husi inimigu, maibé hamriik metin iha imi-nia rai moris fatin hodi hasoru no kontra inimigu. Maun Konis mezmu iha abrigu laran maibé sempre hanoin nafatin timoroan hotu no família sira iha Tutuala,” nia haktuir bainhira hasoru saudozu iha abrigu.
Nia hateten, ohin loron TL liberdade ona no husi liberdade ida-ne’e halo mundu ne’e luan tebes, tan ne’e tenke alkansa mehi.
“Ho mensajen ne’e liga ba tempu ukun-an hakarak husu ba alin sira katak bainhira ita husik Timor la’o ba buka moris no eskola iha ema nia rai keta haluha atu fila mai Timor hodi hadi’a ita-nia rai, tanba nasaun presiza ita hotu nia serbisu hodi kontribui ba iha prosesu dezenvolvimentu Estadu no nasaun,” Izalde fó hanoin.
Nia haktuir mensajen importante husi saudozu nian ne’ebé hakerek ba estudante UNTIM (Universitas Timor-Timur). “Imi buka matenek atu serbí ita-nia rai, rai ida Timor-Lorosa’e, nu’udár patria ida”.
Iha fatin hanesan, Oradór, José Agostinho Sequeira ‘Somotxo, fó sasin ezemplu ne’ebé Saudozu Nino Konis Santana hatudu iha tempu rezisténsia hasoru inimigu.
“Ho lian portugés hateten Konis nunca fez parte do conflito mas sempre fazia parte da solução. Líder ida-ne’ebé hanesan hakarak aprende, ezemplár, umilde, dinámiku buka solusaun ba problema hotu-hotu, líder ida hamutuk ho Xanana defende planu ba pás, iha ambisaun própria mak hakarak serbí nia povu ida-ne’ebé ki’ak,” Somotxo haktuir.
Jornalista: Nelson de Sousa
Editór: Xisto Freitas da Piedade
