DILI, 18 Marsu 2025 (TATOLI)-Governu liuhosi Ministériu Solidariedade Sosiál no Inkluzaun (MSSI), prepara foos saka rihun-51 hodi apoia grupu vulnerável sira durante tinan-ida nia-laran.
“Ita prepara ai-han antisipa ba grupu vulnerável sira, nune’e ita kontinua distribui ai-han ba armazein munisípiu sira hotu tuir pedidu kalkulasaun Sentru Solidariedade Sosiál nian. Nune’e tinan ne’e ita sei prepara saka rihun-51”, Diretór Jerál MSSI, Florencio Pina, dehan ba TATOLI iha nia kna’ar fatin, Kaikoli, tersa ne’e.
Nia hatutan foin lalais AIFAESA deteta kompañia Perissos iha problema uituan, ita la-konsege distribui maibé iha semana hirak liuba AIFAESA anúnsiu katak kompañia Perissos hahú fali loke. Entaun, ha’u hanoin planu oinsá organiza distribui bá armazein munisípiu sira.
“Alende ita apoia foos no ita mós servisu hamutuk ho loja Lider hodi sira prepara ai-han komplementár mak hanesan foos, koto, foremungu no mina inklui susu-been”, nia dehan.
Ba tinan 2025 sei sosa foos saka 51.000, ka tonelada 1.275, ho nia orsamentu $918.000.00.
Foos ne’e planu sei distribui bá munisípiu Aileu saka 1.500, Ainaru saka 1.500, Bobonaru saka 2.400, Baukau saka 2.400, Kovalima saka 2 400, Dili saka 3.900, Ermera saka 2.400, Manatutu saka 1.500, Manufahi saka 1.500, Likisa saka 1.500, Lautein saka 2.400, Vikeke saka 2.400 no Oekusi saka 2.400 no Ataúru saka 600.
Notísia relevante: Solidariedade Sosiál Covalima apoia foos saku rihun 2-resin ba grupu vulneravel
Jornalista : Osória Marques
Editora : Rita Almeida
