RHTO apoia fundu insentivu ba estudante EhD Vikeke na’in-43 iha 2024
VIKEKE, 18 Marsu 2025 (TATOLI)—Organizasaun Raes Hadomi Timor Oan (RHTO), iha 2024, fó apoia fundu insentivu ba estudante ka benefisiáriu Ema ho Defisiénsia (EhD) iha munisípiu Vikeke hamutuk na’in-43.
Ofisiál Raes Hadomi Timor Oan (RHTO), Natalino Pinto, informa RHTO iha fundu insentivu ba EhD ne’ebé mak hala’o hela sira-nia estudu iha ensinu báziku no sekundáriu, atu apoia sira bele sosa kadernu-lapizera, farda eskola nian no nesesidade sira seluk ne’ebé nesesita sira ba eskola.
“Ami-nia apoiu insentivu ne’e tinan ida dala ida, ne’ebé ba estudante ida hetan $75, hodi sira uza ba nesesidade eskola nian,” Natalino Pinto hateten ba Agência TATOLI iha postu administrativu Vikeke Vila, ohin.
Natalino hatutan, fundu ne’e ba estudante ensinu báziku no eskola sekundáriu maibé ba estudante ho kondisaun ema ho difisiénsia sira-ne’ebé hala’o estudu iha esninu superior (universidade).
“Bainhira ita-nia maluk ema ho defisiénsia sira tama ona universidade, ami labele apoia tanba ami-nia fundu ba universidade laiha. Alende ne’e, ba tinan ida-ne’e, ami sei halo identifikasaun ba ita-nia maluk ema ho defisiénsia sira-ne’ebé agora hala’o hela estudu iha ensinu báziku no sekundaláriu, ami hetan sei fó apoiu fundu insentivu ba sira,” nia dehan.
Nia hateten, fundu ne’e fó apoia ba ema ho defisiésia sira-ne’ebé sei hala’o hela sira-nia eskola iha eskola sira iha postu administrativu lima (5) iha munisípiu Vikeke.
“Fundu ne’e ami apoiu postu lima, la’ós ba postu Vikeke Vila. Atu hetan fundu ne’e, ami mak direta halo identifikasaun, hafoin prienxe formuláriu hodi hetan apoiu fundu ba maluk ema ho defisiénsia sira,” nia dehan.
Iha fatin hanesan, benifisiáriu estudante 4 Setembru Vikeke Vila, Rebalino de Araújo Guterres, hato agradesimentu ba RHTO ne’ebé fó apoia fundu insentivu tanba ajuda sira hodi sosa farda eskola nian, kadernu no lapizera sira.
“RHTO apoia fundu insentivu $75.00 ba ha’u ne’e iha tinan kotuk, osan ne’ebé ha’u hetan hodi sosa kadernu, lapizera no farad (uniforme). Ha’u sente fundu ne’e ajuda ona ha’u-nia estudu tanba ha’u ema ho defisiénsia ain. Tan ne’e, ha’u hakarak rekomenda ba RHTO fó apoiu nafatim ba ami to’o iha banku universitáriu, atu ami bele finaliza ami-nia estudu, hanesan ami-nia maluk sira seluk,” nia hateten.
Jornlaista : Vitorino Lopes da Costa
Editór : Cancio Ximenes
