KOVALIMA, 24 Marsu 2025 (TATOLI) – Ministériu Edukasaun (ME), segunda-ne’e, partilla informasaun kona-ba matadalan utilizasaun orsamentu konsesaun eskolár ba diretór eskola, koordenadór Eskola Bázika Filiál no ba Gabinete apoiu tékniku iha munisípiu Kovalima.
Diretora Servisu Munisípiu Edukasaun Kovalima, Elda de Fátima , fó atensaun ba diretór eskola sira tenke tuir atividade ne’e ho másimu nune’e bainhira utiliza orsamentu tuir matadalan.
“Ha’u informa ba ita-boot sira tuir atividade tenke ho sériu tanba ne’e akompaña ho másima nune’e ita-boot sira bele intende kona-ba utilizasaun orsamentu konsesaun eskolár”, nia dehan.
Iha oportunidade ne’e, Prezidente Autoridade Munisípiu Kovalima, Miguel Armada Cardoso, fó hanoin ba dirijente sira ne’e atu utiliza orsamentu konsesaun eskolár tenke tuir matadalan ne’ebé iha.
“Ohin tékniku sira husi Ministériu Edukasaun (ME) disemina informasaun kona-ba matadalan ezekusaun orsamentu konsesaun eskolár importante ba diretór eskola, koordenadór eskola no Gabinete apoiu tékniku sira”, Miguel Armada Cardoso dehan ba jornalista sira, iha salaun AMC, ohin.
Autoridade Kovalima ne’e dehan, atividade diseminasaun informasaun kona-ba matadalan ezekusaun orsamentu konsesaun eskolár ne’e importante bainhira atu ezekuta orsamentu ne’ebé ho valór boot, tanba kada alunu iha direitu ba osan konsesaun eskolár $ 2.00.
Ho nune’e iha eskola ida nia alunu 500-resin nia orsamentu ne’e boot nune’e nia ezekuta hodi sosa ba materiál eskolár, halo manutensaun ki’ik hanesan hadi’a odamatan, janela, troka azeleju rahun no seluk.
Autoridade Kovalima mós forma ona ekipa atu halo hodi monitorizasaun utilizasaun orsamentu bainhira mosu irregularidade PAM sei hatuun despaixu ba diretór ajénsia fiskalizasaun atu halo fiskalizasaun.
Tuir dadus orsamentu konsesaun eskolár ba 2025 eskola pre-eskolár rihun16-resin no ba eskola bázika sentrál orsamentu rihun $ 384-resin.
Fó hanoin fali katak, Ministériu Edukasaun (ME), atribui konsesaun eskolár ba eskola fahe ba kategória hanesan ba eskola pre-eskolár bazeia dekretu-lei númeru 84 artigu 7 ne’ebé altera husi dekretu lei númeru 3/2016 kona-bá estatutu administrasaun munisipál no atribui konsesaun eskolár ba ensinu báziku tuir dekretu-lei númeru 32/2023 artigu 69.o kona-ba gastu orsamentu konsesaun eskolár tuir nesesidade eskola.
Governu atribui konsesaun eskolár fahe ba kategória hanesan konsesaun eskolár ba ensinu pre-eskolár ne’ebé responsabiliza husi munisipál ho nia orsamentu kada estudante $ 0.75 no konsesaun eskolár ba ensinu báziku reponsabiliza ba Ministériu Edukasaun ho nia orsamentu kada estudante $ 2.00
Jornalista: Celestina Teles
Editór: Rafael Ximenes de A. Belo
