BOBONARU, 25 Marsu 2025 (TATOLI)-Eletrisidade Timor-Leste, Empreza Públika (EDTL, E.P) munisípiu Bobonaru sei hakotu liña eletrisidade ba uma-kain 400 resin iha suku Saburai postu administrativu Maliana no aldeia Atus, suku Gildapil, postu administrativu Lolotoe, tanba desde asesu iha tinan-kotuk to’o agora seidauk selu taxa ba Estadu.
Jestór EDTL, E.P munisípiu Bobonaru, Mario de Jesus, hatete ninia parte halo ona enkontru ho autoridade lokál no benefisiáriu sira atu sai kliente legál ho selu taxa $36 kada uma-kain, maibé to’o agora seidauk kumpre.
Notísia Relevante: EDTL Bobonaru dezliga ligasaun ilegál ualu iha Tapo-Memo
“Kuandu ida ne’e mak la-selu, ha’u sei hamate ahi ba suku Saburai no aldeia Atus”, dehan nia ba jornalista sira iha ninia knaar fatin, tersa ne’e.
Nia dehan, EDTL prolonga tan tempu to’o loron 10 fulan-Abríl 2025 atu rejistu, kuandu liu loron ne’e sei aplika ona zero toleránsia.
Jestór haktuir komunidade sira informadu ho didiak katak utilizasaun gratuita válidu de’it durante fulan-neen, liu ida-ne’e konsumidór sira tenke rejistu hodi kontribui taxa ba Estadu mak selu $36 kada uma-kain.
Jestaun ne’e ninia parte presiza duni atu halo, tanba ezijénsia mak EDTL Bobonaru tenke kontribui reseita ba kofre Estadu. “Ami tinan ida-ne’e tenke hamata reseita rihun $60 ba leten”, afirma.
Xefe Suku Saburai, Abel Manu Mali, hateten uma-kain balun rejistu ona, enkuantu sira ne’ebé seidauk rejistu tanba kestaun ekonomia no menus konsiénsia.
“Ami sempre koordena fó hatene nafatin ba komunidade atu rejistu, balun seidauk tanba depende hela ba osan idozu no balu ko’alia nafatin la-fiar ne’e sei simu konsikuénsia”, katak Abel.
Tuir dadus husi EDTL, E.P munisípiu Bobonaru, benefisiáriu iha suku Kowa, postu administrativu Balibo hamutuk uma-kain 500 resin mak rejistu ona.
Notísia Relevante:EDTL Bobonaro reinstala kontadór iha postu administrativu haat
Jornalista : Sergio da Cruz
Editora : Rita Almeida
