BOBONARU, 25 Marsu 2025 (TATOLI)-Komunidade husu ba Ministériu Obra Públika (MOP) atu tau prioridade ba estrada no ponte iha suku Molop no suku Sibuni, postu administrativu Bobonaru, munisípiu Bobonaru iha Orsamentu Jerál Estádu (OJE) 2026.
Notísia relevante: Mota Pazól-Laku difikulta abitante Molop-Sibuni asesu merkadu
“Tempu udan difikulta tebes ami atu movimentu husi suku bá postu Bobonaru ho Maliana, estrada la di’ak, husi aldeia Anapál ho Omelai mak mai tenke hakat mota tolu, mota ida iha Ma’ui ne’e luan loos, depois mota rua iha Pazol ho Laku besik Oalgomo, tanba ponte seidauk iha, ami sente triste no preukupa”, abitante ida husi Molop, Martinho Perreira Afonso, ba TATOLI iha Bobonaru Villa, segunda ne’e.
Nia preokupa tanba problema estrada no ponte afeta tebes ba atividade ekonomia, saúde no seluk tan, tanba joegrafikamente suku Molop no Sibuni lokaliza iha área rural.
“Ami nia inan-aman sira atu lori produtu lokál mai merkadu mos la-di’ak, estrada no ponte la di’ak, kuandu moras ka atu partus mak atendimentu iha suku Molop ho Sibuni la-di’ak, lori mai sentru saúde Bobonaru mos araska, udan ne’e labele de’it, tanba mota rua ne’e klean, ita obriga tama ne’e ita nia vida mos ameasadu, fatuk mesak boot iha mota-laran, mota ne’e mos lori ona ema, oan ho aman”, nia preokupa.
Xefe suku Molop, António Maia, fundamenta tempu bai-loron movimentasaun kontinua la’o, maibé dadaun ne’e kareta difísil atu ultrapasa tanba udan halo rai-mamar.
“Kareta ki’ik liu araska, uza trasaun sira ne’e mak bele liu, truk (kamioneta) sira mos bele liu, akompaña ho dada, mesak de’it entaun labele tanba rai sei mamar”, katak ba TATOLI liuhusi WhatsApp, tersa ne’e
Antes ne’e, xefe suku António dehan lider komunitária iha mandatu sesante hato’o bebeik ona problema ne’e ba parte relevante no Governante mos haree rasik ona ho matan, maibé to’o agora seidauk iha rezultadu.
Abitante ida seluk husi suku Sibuni, Marcelino de Jesús Melo, dehan governu presiza tau-matan ba infrastrutrura bázika iha suku Molop no Sibuni, tanba suku rua ne’e mos iha potensia ba rekursu naturál no rekursu seluk tan ne’ebé ba futuru bele kontribui reseita ba kofre Estadu.
“Ami suku rua ne’e iha rikusoin hanesan gás natural, ai-kameli, ai-kamii no seluk tán, entaun ita tenke kria kondisaun liuhusi hadia estrada no ponte”, afirma.
Sorin Seluk, administradór postu administrativu Bobonaru, munisípiu Bobonaru, Tomás Barreto Henriques, rekuñese problema ne’e seríu no nia parte hato’o ona ba MOP.
“Ha’u preukupa ho kondisaun estrada sira ne’e, foin lalais ha’u kontaktu ona diretór obras públika katak hirak ne’e tama ona planu, Timor ne’e la’ós de’it Bobonaru mak ezije, ne’ebé fazeadamente”, katak nia.
Prezidente autoridade munisípiu Bobonaru, Alexandre Pires, deklara problema ne’e autoridade munisípál labele rezolve ho orsamentu Planu Dezembolvimentu Integradu Munisipál (PDIM) tanba konsidera grande projetu ne’ebé kabe ba kompeténsia governu sentrál.
Tuir informasaun ne’ebé TATOLI asesu katak iha 2022 ne’e mota Laku konsege hamate ema na’in-rua (oan no aman) hafoin viajen husi postu Bobonaru iha tempu udan.
Aleinde ne’e, iha tinan entre 2015 no 2016 mós akontese mota lori ema na’in-tolu no la-konsege salva sira-nia vida.
Notísia relevante:Abitante sira iha Omelai halerik ba estrada-ponte
Jornalista : Sergio da Cruz
Editora : Rita Almeida
