OEKUSI, 25 Marsu 2025 (TATOLI)–Ministru Agrikultura, Pekuária, Peska no Floresta (MAPPF), Marcos da Cruz hamutuk ho Sekretária Rejionál ba Asuntu Agrikultura, Filomena Sila, segunda ne’e, lansa kuda hare ho mákina iha natar Maumate, suku Naimeko, sub-rejiaun Pante Makasar Rejiaun Administrativa Espesiál Oekusi Ambeno (RAEOA).
Biban ne’e, Ministru Marcos, hateten programa kuda hare ho mákina nu’udar teknolojia agríkola moderna ne’ebé apoia husi Banku Mundiál liuhusi projetu Sustainable Agriculture Productivity Improvement Project (SAPIP,sigla inglés).
Notísia relevante:Komisaun D nota implementasaun projetu SAPIP fó benefísiu ba agrikultór
Objetivu atu moderniza sistema agrikultura hodi fasilita natar na’in-sira halo servisu ho efetivu no efikasia hodi hasa’e produsaun hare iha rai-laran no mós tan ne’e Governu mós tau orsamentu hodi sosa tan mákina agríkola ho teknolojía moderna atu oferese ba agrikultór iha territóriu laran tomak, la’ós grupu alvu programa SAPIP de’it.
“Ha’u mai Oekusi ho objetivu tolu primeiru mai ko’alia ho agrikultór sira kona-ba oinsa servisu hamutuk atu aumenta produsaun bele servisu hamutuk mós atu proteje ai-laran sira hodi kuda ai no proteje ita-nia ai-laran sira,” dehan Governante iha suku Naimeko, segunda ne’e.
Daruak, mai atu fahe mákina modernu ne’ebé sei uza atu aumenta produsaun liuliu ba hare, nune’e mákina ne’ebé fahe mak hand-tratór hamutuk 31 ba Oekusi no mákina kuda hare 10 no mákina koa hare lima, no tratór fila-rai nian.
Datoluk, Governante ne’e dehan atu koko ba lansamentu kuda hare nian, mákina ne’e modernu nune’e presiza koko hodi utiliza iha natar laran atu hatudu ba povu katak ba oin, hirak-ne’ebé simu mákina ne’e bele uza ho didi’ak, nune’e tempu kolleta bele uza tan mákina koa hare nian.
Notísia relevante:MAPPF entrega ofisialmente ekipamentu agríkola ba autoridade RAEOA
“Apela ba sira uza mákina hirak-ne’e ho didi’ak, nune’e uza atu halai natar, kuda hare no koa hare, atubele aumenta produsaun ba hare, nune’e bele redús importansaun no hamutuk ita bele konserva, proteje, kuda ai, tanba ai-horis importante atu bele konserva bee no proteje ita-nia raihusi erosaun no dezastre naturál seluk,” nia dehan.
Autoridade RAEOA agradese MAPPF
Entretantu, Sekretária Rejionál ba Asuntu Agrikultura, Filomena Sila hato’o agradese ba Governu hodi moderniza ona hahú husi fila-rai, kuda to’o koa hare.
“Ohin loron importante tebes ba Oekusi tanba foin primeira-vez ita halo lansamentu kuda hare uza mákina iha suku Naimeko, nomós ita sei distribui tan mákina tolu ba grupu SAPIP sira iha suku Naimeko, no makina rua ita fó ba grupu SAPIP iha Suku Bobometo, ida-nee hanoin di’ak tebes husi Ministériu ho parseiru sira atubele muda sistema agrikultura manuál agora ita bele uza sistema modernizasaun, ne’ebé fasil tebes ba ita nia agrikultór sira atu kontinua hasa’e produsaun rai-laran,” nia afirma.
António Seni, nu’udar agrikultór husi suku Naimeko, hato’o obrigadu ba Governu liuhusi MAPPF tanba bele ajuda no tulun ona hodi apoia ekipamentu agríkola modernu atubele hakma’an servisu ne’ebé sira infrenta iha tempu naruk.
“Ami husu obrigadu barak tanba ami nu’udar agrikultór agora Estadu tau-matan ba ami, hodi fó susesu ba ami-nia atividade, tan ne’e ami hato’o ba nain-ulun sira atu kontinua tau atensaun mai ami,” nia orgullu.
Rekorda fali katak antes ne’e, iha fulan-Janeiru 2025 Sekretária Rejionál Agrikultura RAEOA hamutuk ho Ministériu Agrikultura Pekuária, Peska no Floresta, distribui ona tratór unidade 27 no hand-tratór unidade 31 ba grupu alvu SAPIP iha suku neen.
Notísia relevante:Grupu agrikultór 71 implementa projetu HAPAS iha Oé-Cusse
Jornalista: Abílio Elo Nini
Editór: Florencio Miranda Ximenes
