OEKUSI, 27 Marsu 2025 (TATOLI) – Ponte alternativa ida lokaliza iha suku Abani sub-rejiaun Pássabe Rejiaun Administrativa Espesiál Oekusi Amebno (RAEOA), empreza finaliza iha fulan-Abríl tinan ne’e, tanba progresu servisu fíziku atinje ona 40%.
Projetu ne’e ezekuta husi husi empreza Bubmen Unipesoál Lda ho valór kontratu $39,812.76 ho durasaun servisu durante fulan-tolu.
Diretór Diresaun Rejionál Infraestrutura, Remígio Nuno Sila, esplika, ponte alternativa ne’e atu liga komunidade sira iha aldeia Pássabe ba sentru saúde no Eskola Bázika Sentrál Pássabe, no mós ba aldeia Haemnanu kontinua ba suku Malelat inklui liga postu UPF Krúz.
Notísia relevante:Rogério Lobato halo diálogu ho komunidade iha Pássabe
“Ponte ne’e tama iha projetu emerjénsia KAFI rejionál daruak, agora servisu la’o hela, ita hein katak, empreza sei finaliza fulan Abríl, atu nahe ona simenti tanba agora nia progresu servisu 40%,” nia hateten, iha sub-rejiaun Pássabe.
Xefe suku Abani, Carlos Elo, hateten, katak ponte referida kondisaun aat tinan rua ona, maibé tinan kotuk to’o agora Autoride konsege rezolve ona maske obra la’o hela, maibé espera bele finaliza iha tempu badak bele finaliza, nune’e bele fasilita komunidade sira.
“Durante ne’e karreta motor labele liu, kuandu ultrapasa ba buka fali dalan foun, triste tanba ponte liga ba postu saúde, maibé ha’u orgullu tanba Autoridade RAEOA apoia ona, espera katak iha tempu badak bele finaliza ona, nune’e komunidade no transporte sira bele asesu,”nia hateten.
Notísia relevante:Autoridade RAEOA hatuur fatuk-inan ba konstrusaun eskola rua iha Pasabe
Iha Pasabe, PNDS implementa obra lima korresponde ba nesesidade komunidade
Jornalista: Abílio Elo Nini
Editór: Florencio Miranda Ximenes
