DILI, 02 Abríl 2025 (TATOLI)—Diretór Aprovizionamentu Institutu Nasionál Farmaséutiku no Produtu Médiku (INFPM), Sergio da Costa Belo, hateten, semana oin, vasina Sarampu/Rubella sei to’o iha Timor-Leste.
Fundu Nasaun Unida ba Labarik (UNICEF-sigla inglés) mak sosa vasina referida ho orsamentu INFPM. INFPM sosa vasina hamutuk lima ho orsamentu millaun $1 no entre lima ne’e vasina Sarampu/Rubella mak sei to’o uluk.
Objetivu husi sosa ai-moruk hirak-ne’e, António esplika, tanba laiha estoke iha armazein sentrál INFPM.
“Horisehik ami iha enkontru ho UNICEF, sira dehan katak iha loron 7 Abríl tinan ne’e, vasina ba labarik sira sei to’o ona iha Timor-Leste,” Sergio da Costa Belo hateten ba TATOLI iha nia kna’ar fatin, INFPM, Kampung Alor, Dili, kuarta ne’e.
Nia haktuir, relasiona ho keixa husi públiku liuliu iha sentru saúde sira iha Dili, ne’ebé estoke vasina hotu ona ba bebé ho idade fulan sia, tanba ne’e tuir nia katak kada tinan laiha problema iha sosa vasina, maibé iha obstákulu balun tanba ai-moruk to’o tarde uitoan.
“Normalmente, iha vasina hamutuk 12, maibé sira-ne’ebé agora daudaun iha prosesu kompra hamutuk lima mak hanesan vasina Sarampu/Rubella, vasina Tetanus Toxoid (TT)/Tetanus Diphteria (Td), vasina Rotavirus, vasina HPV no Covid-19,” Sergio esplika.
Diretór ne’e subliña, maski vasina sira-ne’e balun laiha ona iha armazein sentrál, maibé nafatin garantidu iha armazein iha munisípiu sira hanesan Baukau, Ainaru no Bobonaru.
Tinan ne’e, INFPM aloka fundu ho valór millaun $13 hodi sosa ai-moruk. Daudaun ne’e estoke ai-moruk iha INFPM hamutuk 77% no stock out hamutuk 23%, ba ai-moruk hanesan vitál, esensiál no nesesáriu.
Entrega vitamina A
Iha fatin hanesan, Diretór Aprovizionamentu iha Institutu Nasionál Farmaséutiku no Produtu Médiku (INFPM), hateten Fundu Nasaun Unida ba Populasaun (UNFPA-sigla portugés) mós entrega ona Vitamina A hamutuk 60.000 ba INFPM.
“Liga ho keixa husi Parlamentu Nasionál kona-ba stock out Vitamina A, daudaun ne’e estoke Vitamina A to’o ona, ho totál hamutuk 60.000. Ne’e rai ona iha-ne’e atu halo inspesaun depois hotu sei distribui ba fasiliddade saúde sira,” Sergio tenik.
Nia esplika, INFPM sosa Vitamina A ho orsamentu jerál Estadu anterior no sosa liuhusi UNFPA.
“Fundu hodi kompra vitamina ne’e ha’u la lembra, tanba sosa liuhusi fundu anteriór nian,” nia haktuir.
Jornalista: Felicidade Ximenes
Editór: Xisto Freitas da Piedade
