DILI, 03 Abríl 2025 (TATOLI) – Ministériu Turizmu liuhusi Diresaun jerál turizmu prezide atu proteje no promove sítiu turístiku sira ne’ebé limitadu iha kapitál hodi kontinua atrai no fó kontribuisaun ba dezenvolvimentu nasaun.
Diretór Jerál, António da Silva ko’alia ba komunidade no joven timoroan sira katak rekursu turizmu iha Timor-Leste (TL) limitadu.
“Ita Timór ne’e, ita-nia produtu sira-ne’e sensitividade ne’e boot loos. Entaun ita tenke kuidadu ita-nia turizmu ne’e ho di’ak”, ezekutivu ne’e hateten ba jornalista TATOLI, iha edifísiu Diresaun jerál turizmu, Vila-Verde, Dili, kinta ne’e.
Diretór mós subliña kestaun konsiénsia ema nian. Katak, fó hanoin bebeik atu utiliza fatin sira ho responsabilidade inkluzivamente lixeiru sira ne’ebé eziste no estabelesidu ona.
“Ita rasik mak tenke hadomi ita-nia eko turizmu ne’ebé mak iha, ita rasik mak sei promove, ita rasik mak sei hetan nia benefísiu, bainhira indústria turizmu ne’e ita dezenvolve ho di’ak,” nia afirma.
Autoridade turizmu ne’e destaka, sítiu turizmu iha Dili, entre fatin seluk, ida mak Kristu Rei – área protejida no fatin relijiozu. Nune’e mós estatua Amu Papa João Paulo II nian iha Tasi-tolu.
Diretór Jerál, António da Silva esplika, Ministériu Turizmu iha Diresaun nasionál dezenvolvimentu turístiku ne’ebé haree liuba iha infranstrutura nian no aloka mós verba hodi hasa’e no mós halo manutensaun ba fasilidade sira ne’ebé iha ona. Nune’e mós ba infraestrutura bázika sira hodi fasilita bainaka sira.
“Iha pessoa ne’ebé aloka iha ne’ebá, horiseik no iha sesta liubá mós ami ba iha ne’ebá, ita haree fatin ne’e kapas loos, moos loos, tanba ita iha fasilidade, iha pessoa ne’ebé mak halo manutensaun ka ordena fatin ne’e halo moos”, nia haktuir.
Nia akresenta, fatin balun la kabé ba kompeténsia Ministériu Turizmu nian maibé Autoridade munisípiu Dili (AMD) nian. Maske nune’e, parte rua nafatin kolabora malu oinsá bele halo armonizasaun nune’e bele uza fasilidade públiku sira ho di’ak.
“Ita sei kolabora hamutuk ho Munisípiu Dili, oinsá atu halo intervensaun liuliu ba sidade sira ne’ebé mak iha Dili. Ita tenta nafatin maksimiza fatin ne’ebá, nune’e bele halo manutensaun liuliu ba fasilidade ne’ebé públiku uza. Ita mós sei haree ba arranjamentu ba atividade komérsiu, arranjamentu ba movimentu ema no transporte rasik, inklui ema sira ne’ebé hala’o vizita ba área Kristu Rei”, nia deklara.
Diretór rekorda katak MT enkontru ho Sekretáriu Estadu Asuntu Toponímia no Organizasaun Urbana (SEATOU) aborda kestaun sira kona-ba posibilidade avansa modalidade ba jestaun sira iha área ne’e.
“Agora ita haree kona-ba kazu isu ida-ne’ebé mak ohin ita-haree hamutuk ne’e mak kona-ba hanusa atu halo kontrolu ba estasionamentu, liuliu ita atu halo hanesan portaun entrada ida, ninia modelu arranjamentu ne’e, karik ita bele foti ezemplu balun ne’ebé implementa ne’e iha, aeroportu nian ne’ebá,” ezekutivu ne’e haktuir.
“Maibé ida-ne’e primeiru tenke haree ba kestaun legál, liuliu ajénsia Governu direta liuliu iha ámbitu ba jestaun fatin ne’e rasik, no mós ita ko’alia halo diskusaun halonusa mak bele iha, dezeñu enjenária ida-ne’ebé mak di’ak, nune’e bele fasilita duni planu ba jestaun estasionamentu ne’ebé tau iha área Kristu Rei nian ne’ebá ne’e”, nia ko’alia.
Iha biban ne’e, autoridade ne’e mós husu ba komunidade inklui vizitante sira soe fo’er iha nia fatin. “Se bele karik ita lori lixu ba no lori fila-fali, labele halo estraga mós ba ambiente, labele halo buat sira-ne’ebé mak fó risku ba ita-nia aan rasik, nu’udar ita ne’ebé mak utilizadór ba fatin-ne’e hodi fó risku ba ema seluk”.
Jornalista: Alexandra da Costa
Editór: Rafael Ximenes de A. Belo
