DILI, 09 Abríl 2025 (TATOLI)-Prezidente Konsellu Administrasaun Institutu Nasionál Seguransa Sosiál (INSS), Arlindo Pinto, hatete Fundu Rezerva Seguransa Sosiál (FRSS) komunika ho entidade finanseiru hodi aplika ba investimentu iha nivel esteriór.
“Daudaun ne’e Fundu Rezerva Seguransa Sosiál halo ona komunikasaun ba entidade finanseiru, ka entidade jestaun finanseiru atu aplika investimentu iha nivel esteriór, hanesan Banku Sentrál mós ami komunika ona inklui entidade jestaun finanseiru sira liuliu Banku Komersiál sira, para bele halo jestaun investimentu iha nivel esteriór nian”, Arlindo Pinto dehan iha Bebora.
Prezidente INSS dehan komunikasaun sira ne’ebé halo ho jestaun finanseru sira mak Banku Mandiri iha Singapura.
“Ita iha preparativu dokumentu, liuliu ba investimentu esteriór nian hanesan kaixa deposita Portugal nian, dokumentu preparadu, espera fulan ida-rua sei ba asina investimentu asoens sira ne’ebé ita define iha kontratu jestaun finanseiru para bele jere mós iha fundu ne’ebé ita jere”, dehan.
Fundu Rezerva Seguransa Sosiál iha 2024 hamutuk miliaun $254 ho orasamentu fizikamente miliaun $233 ne’ebé mak agora aplika ona iha merkadu finanseira liuhusi depozita prazu no halo prosesaun liliu ba fundu rezerva seguransa sosiál iha tinan 2025 ninan purvolta 306 miliaun ne’e mak projeta iha 2025.
Notísia relevante: MSSI aprezenta relatóriu kona-ba Fundu Rezerva Seguransa Sosiál
Jornalista : Osória Marques
Editora : Rita Almeida
