KOVALIMA, 10 Abríl 2025 (TATOLI)- Autoridade Protesaun Sívil (APC-sigla Portugés) identifika vítima dezastre naturál ho tipu erosaun no ahi han uma hamutuk uma-kain 20-resin mak elijível atu hetan apoiu materiál rekuperasaun husi Governu.
Komandante APC Munisípiu Kovalima, Celestino Ferreira Afonso relata katak hahú Janeiru to’o Marsu ne’e, APC rejistu dezastre naturál tipu sira hanesan ahi han uma, rai-halai ne’ebé akontese iha Postu administrativu Fatumea no inundasaun.
“Uma-kain ne’ebé ita rejista sai vítima dezastre naturál ho tipu ne’ebé mak la hanesan balun dezastre natural ho tipu sira hanesan inundasaun, rai-halai, no ahi han uma”, Celestino Ferreira Afonso hato’o dadus ne’e ba jornalista sira, iha sede suku Kasabauk, postu Tilomar, ohin.
Tuir dadus, totál vítima dezastre naturál hamutuk 41 hetan hotu ona apoiu emerjénsia hanesan ai han ho la’ós ai han ba vítima sira hodi hakmaan sira-nia susar.
Bazeia ba kritériu husi APC, defini katak atu fó apoiu materiál rekuperasaun kategoriza ba aat naton, aat kmaan no aat totál, ne’ebé APC identifika família uma-kain 20-resin mak elijível atu hetan apoiu materiál rekuperasaun.
Vítima dezastre naturál ne’ebé elijível atu hetan apoiu materiál rekuperasaun, APC submete ona relatóriu no hodi hein desizaun husi nasionál.
Notísia relevante:Ai monu hanehan uma ida iha Tabakolot-Kovalima, Uma-na’in lamenta servisu APC
Jornalista:Celestina Teles
Editór: Rafael Ximenes de A. Belo
