OEKUSI, 21 Abríl 2025 (TATOLI)–Prezidente Autoridade Rejiaun Administrativa Espesiál Oekusi Ambenu (RAEOA), Rogério Tiago Lobato, hatete daudaun ne’e konsentra ba futuru sertifikasaun, nune’e bele rekolla taxa husi aeroportu ba kofre Estadu ho valór boot.
“Ita agora halo esforsu tomak, atu ita-bele halo sertifikasaun ba aeroportu, bainhira ita halo konstrusaun ne’e ita gasta millaun $199-resin, seidauk konta ho fasilidade mákina seluk, ne’ebé agora ita konsentra esforsu tomak ba sertifikasaun, kuandu iha ona sertifikasaun, ita hatama polísia imigrasaun, alfandega entaun taxa sei komesa sa’e maka’as, agora uitoan de’it, ita kobre husi kompañia sira-ne’ebé halo esplorasaun ba mákina ne’ebé simu pasajeiru sira, maibé osan ne’e kiik-liu, ha’u lakoi fó nia númeru maibé kiik tebes”, dehan nia ba TATOLI.
Notísia relevante:MTK prosesa sertifikasaun Aeroportu Doméstika Oe-Cusse
Foto Tatoli, I.P/Abílio Elo Nini
Eis-Prezidente Autoridade RAEOA, Arsénio Paixão Bano, preokupa no lamenta tanba kuaze atu tama tinan ida ona, aeroportu Rota do Sândallo RAEOA laiha taxa atu kontribui ba kofre Estadu.
“Uluk ita fó subsidíu maibé osan tama fali ba kofre Estadu, agora osan tama oinsá, se Aero Dili kompañia privadu, entaun taxa laiha ba kofre Estadu, maibé gasta tan atu fó subsidíu, tuir loloos Aero Dili selu ba taxa aeroportuáriu tanba uza ona ita-nia aeroportu Oekusi”, Bano hato’o lamentasaun ne’e ba jornalista sira iha Oekusi, ohin.
Notísia relevante:RAEOA aloka rihun $600 iha OJE 2025 hodi subsidia Aero Dili
Eis-Ministru MSSI ne’e rekomenda ba Autoridade RAEOA, presiza reativa fali operasaun aviaun ZEESM nian, tanba aviaun referidu nu’udar pátrimóniu Estadu, atu halo operasaun Oekusi-Dili no ba Kovalima.
Notísia relevante:Autoridade RAEOA rekolla reseita rihun $395-resin hosi operasaun aviaun ZEESM
Governu Timor-Leste, sosa aviaun ZEESM ne’e ho montante millaun $7,700, husi nasuan Kanadá, iha 2013 ho tipu De Havilland Canada DHC-6 Twin Otter, no hahú halo operasaun iha Timor-Leste iha tinan 2015, entre Dili Oekusi no Suai.
Entretantu, kona-ba aeroportu Rota do Sândalo Oekusi, harii iha 2015, husi empreza estatál Indonézia, PT. Wijaya Karya ho valór kontratu millaun $199,9 no inaugura husi Prezidente Repúblika, Francisco Guteres Lú Olo, iha loron 18 Juñu 2019.
Notísia relevante:RAEOA-ANATL selebra akordu ba operasionál aeroportu Rota do Sândalo
Jornalista : Abílio Elo Nini
Editora : Rita Almeida
