DILI, 22 abríl 2025 (TATOLI) – Sarani sira entuaziasmu halo orasaun ba Papa Francisco nia klamar iha Monumentu Nossa Señora Imaculada da Conceição, Lecidere.
Monumentu ne’e konstrui no apoia husi Governadór Provínsia Timor, Kapitaun Serpa Rosa iha tinan 1954 no inauguradu iha tinan 1956.
Ideia ba konstrusaun monumentu ne’e hetan apoia husi Governadór Provínsia Timor, Kapitaun Serpa Rosa, Administrador Munisipalidade Dili, Manuel Dias Peão. Planu ne’e dezeñadu husi Xefe Obra Públika, Kadastru no Agrimensura, Kapitaun Enjeñaria Alberto Simões.
Largo Lecidere nu’udar sentru selebrasaun no orasaun hahú husi loron 11 Outubru tinan 1962. Iha momentu ne’ebá, Governador do Bispado, Pe. Jorge Barros Duarte, selebra misa ida iha momentu Nosa Señora Imaculada da Conceição ne’e.
Iha okaziaun ne’e abertura mós Konsíliu Vatikanu II, nune’e kada tinan, ne’ebé monu iha loron 13 Outubru, prosesaun ho imajen Virjen sempre hakotu prosesaun iha Largo Lecidere.
Monumentu Nosa Señora Imaculada da Conceição, Lecidere, nu’udar mós fatin ordenasaun ba Bispu Filipe Ximenes Belo iha 1988 no Dom Alberto Ricardo da Silva iha 2004.
Estudante ida iha Institutu Canossa, Delfina do Rosário da Costa, sente triste tanba lakon Santu Padre ida, ne’ebé motiva timoroan sira atu moris iha fiar nian.
“Papa nu’udar ema ida-ne’ebé motiva timoroan sira atu moris iha fiar no esperansa, bainhira vizita nasaun ne’e iha fulan-Setembru tinan kotuk. Ha’u mai iha-ne’e atu hato’o ha’u-nia orasaun, ami hatene katak ami-nia Padre Igreja Katólika hakotu iis horisehik ami triste, maibé ida-ne’e dalan úniku, ami hato’o de’it orasaun”, Delfina do Rosário da Costa dehan ba TATOLI, iha Lecidere.
Amo Papa nu’udar servidór ba povu tomak hodi sai husi Vatikanu mai Timor Leste, lori mensajen esperansa no unidade.
“Ita sarani, ita hanoin Amu-Papa, nia mak Santu Padre di’akliu ne’ebé vizita Timor-Leste, nia fó bensaun ba ema ki’ak no moras sira”, nia haktuir.
Tanba ne’e, nia mai iha jardín Lecidere no hamutuk ho sarani sira hotu hodi hato’o orasaun ba Amu Papa nia falesimentu.
Nune’e mós Sarani Camilo de Oliveira, sente triste bainhira rona novidade katak amu papa Francisco mate.
“Ha’u mai iha jardín Lecidere hodi hasa’e ha’u-nia orasaun ba Amu Papa nia mate, tanba tinan kotuk nia mai vizita ita-nia rain lori dame no pas mai ita,” Camilo de Oliveira hateten.
Iha sorin seluk, membru órgaun soberanu sira kontinua vizita Kámara Ekleziástika Arkidioseze Metropolitana Dili, hodi asina livru kondolénsia kona-ba Papa Francisco nia falesimentu.
Jornalista : Felicidade Ximenes
Editór: Evaristo Soares Martins
