OEKUSI, 25 Abríl 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Rogério Tiago Lobato, no Sekretáriu Rejionál sira halo diálogu ho komunidade iha suku Usitasa’e, Bobometo no Usitaqueno, sub-rejiaun Oésilo.
Objetivu husi diálogu ne’e atu fó oportunidade ba populasaun sira atu hato’o direta problema sira durante ne’e enfrenta iha suku no aldeia, nune’e ba oin bele fó solusaun no aposta ba Planu Asaun Anuál (PAA) tinan tuirmai.
Notísia relevante: PA RAEOA nota reabilitasaun estrada rurál iha Oésilo-Pássabe laiha kualidade
“Ohin, ha’u lori Sekretáriu Rejionál sira mai hotu, atu problema saida de’it mak imi enfrenta, hato’o ba sira no hato’o mós mai ha’u hanesan Prezidente Autoridade RAEOA. Buat ne’ebé ha’u bele rezolve, bele rezolve kedas, sei labele, ita tau ba planu tuirmai, tau osan atu buka solusaun. Ha’u husu liuliu saúde, bee-moos, edukasaun no seluk-taan, ha’u tenke tun bá suku sira iha kada postu administrativu atu ko’alia direita, rona rasik no haree ho matan”, Rogério Lobato dehan iha sede suku Bobometo.
Iha ámbitu ne’e, Rogério Lobato, mós introdús polítika Governu nian ba komunidade, katak tinan ne’e Governu foku atu hadi’a estrada sira iha territóriu, inklui iha RAEOA.
Notísia relevante: Rogério Lobato husu komunidade apoia jestór foun dezenvolve sub-rejionál Oésilo
Antes ne’e, iha Oekusi, Konsellu Administrasaun Fundu Infraestrutura (KAFI) ezekuta ona projetu barak, dahuluk tolu, daruak ualu no daudaun iha projetu 27 ho kategoria emerjénsia.
“Polítika Governu liuhusi maun-boot primeiru-ministru hakarak hasai povu husi izolamentu. Ida mak estrada. Iha tinan ne’e, ita hakarak rezolve hotu problema estrada sira. Estrada sira ita haree rezolve daudaun ona. Ida-ne’e atu fasilita imi viajen husi suku bá vila no ba fasilidade saúde atu konsulta, inklui lori imi-nia produtu bá merkadu. Semana oin, nia [Xanana] sei mai. Ha’u sei konvida nia atu observa estrada sira iha Nítibe, Oésilo to’o Pássabe”, dehan.
Notísia relevante: Autoridade RAEOA prevee rihun $100-resin reabilita monumentu Masakre Tumin
Iha biban ne’e, Xefe Suku Bobometo, José Labi Caet, reprezenta suku tolu agradese ba autoridade RAEOA, tanba diálogu mak oportunidade di’ak atu hatene no identifika susesu no dezafiu saida mak komunidade enfrenta iha baze.
“Komunidade entuziazmu hato’o sira-nia preokupasaun, rekomendasaun sira. Ida-ne’e oportunidade, tanba boot sira bele rona rasik, tanba ikus ne’e mídia sosiál kritika Governu ho problema oioin. Ne’ebé ha’u apresia polítika autoridade, di’akliu tun mai hasoru povu ko’alia direta, nune’e ba futuru halo planu atu rezolve”, realsa.
Notísia relevante: Rogério Lobato promete rezolve problema infraestrutura bázika iha sub-rejiaun sira
Durante diálogu komunitáriu ne’e, komunidade hato’o preokupasaun sira liuliu harii ponte iha mota Noel-ekat, falta profesór, populasaun balun seidauk asesu liña elétrika no problema bee-moos.
Jornalista: Abílio Elo Nini
Editora: Maria Auxiliadora
