DILI, 28 Abríl 2025 (TATOLI)—Ministru Komérsiu no Indústria, Filipus Nino Pereira, segunda ne’e, lansa Dili International Trade Expo 2025 (DITE-2025) nu’udár espozisaun komersiál internasionál dahuluk ne’ebé organiza iha Timor-Leste ne’ebé sei hahú iha 28 Agostu to’o 01 Setembru 2025, iha Sentru Konvensaun Dili (CCD-sigla portugés).
“DITE-2025 nu’udár espozisaun komersiál Internasionál dahuluk ne’ebé organiza iha Timor-Leste ho objetivu atu halibur nasaun sira, empreza ki’ik, média no empreza boot sira, Organizasaun Naun-Governamentál sira no Organizasaun Governamentál Internasionál sira (OGI) atu hatudu sira-nia realizasaun no hatudu buat foun sira liuhusi inovasaun, kultura no teknolojia, no mós enkoraja kolaborasaun entre setór oioin,” Nino Pereira dehan ba jornalista sira, bainhira halo lansamentu ofisialmente ba feira ne’e iha edifísiu Ministériu Komérsiu no Indústria (MKI), Bebora, Dili.
Nia dehan, DITE-2025 Governu hatuur ona iha planu asaun 2025 nian iha MKI no ida-ne’e atu haree mós ba potensialidade ne’ebé mak eziste hanesan potensialidade ekonómiku, negósiu no potensialidade produtu no hatuur mós kompeténsia ne’ebé mak fó mai iha MKI atu halo promosaun no divulgasaun ba produtu akresentadu valór ekonomiku aas hodibele responde nesesidade merkadu railaran no mós merkadu internasionál.
Nino esplika, espozisaun (feira) ida-ne’e aleinde promove setór ekonómiku oinoin iha Timor-Leste no hametin kooperasaun ekonómika ho entidade hotu-hotu, hakarak selebra mós tinan 50 Loron Proklamasaun Independénsia RDTL.
Nia konsidera katak DITE-2025 sei fó oportunidade ba estabelesimentu kontatu no esperiénsia komersiál, industriál no kulturál sira, enkoraja ligasaun globál sira, liuhosi programa oinoin hodi promove empreza no produtu sira, Talk Show diretu, Business Match Making, asinatura Memorandu Entendimentu entre partisipante sira, Showcase Art no Kultura, múzika nasionál, aprezentasaun diretu hosi artista sira, inovasaun hosi Universidade no Empreza sira, aprezentasaun kona-ba oportunidade negósiu no investimentu hosi governu, orgaun distritál sira no Kámara Komérsiu no Indústria nomós sei iha aprezentasaun kona-ba asesu ba kréditu bankáriu.
Espozisaun ida-ne’e sei iha pavillaun sira ho tema: “Oportunidade ba rede no esperiénsia kulturál, enkoraja ligasaun globál”.
Dezde sai membru Organizasaun Mundiál Komérsiu (OMK) no iha prosesu atu sai membru ASEAN, eventu ida-ne’e sei fó oportunidade ba komersiante nasionál no internasionál, fabrikante, industrialista, atu kolabora no investe iha Timor-Leste ho konseitu make it & brand it sei serbí merkadu ASEAN no mundiál ho produtu Made in Timor-Leste.
Nino relata orsamentu ne’ebé uza hodi hala’o feira DITE-2025 ne’e hamutuk rihun $300-resin.
Entretantu, feira ne’e realiza liuhusi kolaborasaun entre Ministériu Komérsiu no Indústria no Gabinete Ministru Koordenadór Asuntu Ekonómiku (MCAE-sigla portugés) no mós Ministériu Turizmu no Ambiente (MTA).
Jornallista: Felicidade Ximenes
Editór: Xisto Freitas da Piedade
