OEKUSI, 29 Abríl 2025 (TATOLI) – Abitante sira iha sub-rejiaun Pássabe, liuhusi responsavel veteranu zona Pássabe, António Lafo, no Xefe Suku Abani, Carlos Elo, rekomenda ba Primeiru-Ministru, Kay Rala Xanana Gusmão, atu nomeia ona Oekusi-oan hodi lideira rasik Rejiaun Administrativa Espesiál Oekusi Ambeno (RAEOA) no Zona Ekonómika Espesiál no Dezenvolvimentu Oekusi Ambeno (ZEEDOA).
Adjuntu Diretór EBC Pássabe, António Lafo, hato’o nia rekomendasaun ne’e iha ámbitu diálogu abertu ho primeiru-ministru iha sede suku Abani, tersa ne’e.
“Ami rona, rezolusaun ida aprova husi Konsellu-Ministru atu mai halo reajustamentu ba estrutura RAEOA no ZEEDOA, ami agradese tebes, tan ne’e ami husu maun boot se bele Oekusi-oan mak bele lidera, ida-ne’e mak ami aprezenta ba maun boot”, nia dehan iha Pássabe.
Notísia relevante: Veteranu sub-rejiaun Haksolok apoia rezolusaun Governu nomeia Oekusi-oan lidera RAEOA-ZEEDOA
Nia agradese mós ba autoridade RAEOA, lideradu husi Rogério Lobato no koordenadór ZEEDOA, João Mendes Gonçalves, tanba tinan ida maske ho tempu udan, maibé konsege hala’o vizita no dialogu ho komunidade iha sub-rejiaun sira.
Iha fatin hanesan, Xefe suku Abani, Carlos Elo, reforsa katak Oekusi prienxe ona rekejitu, tanba rekursu umanu sufisiente atu hamriik mesak.
“Ami rona buat barak husi avó Nana hateten katak intelektuál Oekusi prepara oan sira ba futuru bele lidera rasik imi-nia rai, maibé ami hakarak hateten katak ami pronto. Ami mós iha kapasidade no rekusru umanu natoon atu garante hodi lidera ami-nia rai rasik. Razaun katak, Oekusi-oan iha rekursu umanu na’in-haat hasai ona kursu doutoramentu, mastradu no maioria lisensiátura, no iha mós eis-titulár”, Carlos Elo salienta.
Notísia relevante: Arsénio Bano apoia rezolusaun Governu nomeia Oekusi-oan lidera RAEOA-ZEEDOA
Foto/Abílio Elo Nini.
Iha biban ne’e, Xefe Suku Abani no Malelat, entrega dokumentu ba xefe Governu ho mensajen katak ida-ne’e la permite atu loke iha públiku.
“Ami nia karta ne’e, entrega de’it ba maun boot mesak. Ami husu labele loke iha ne’e, maibé to’o uma mak bele loke mesak no lee didi’ak. Ida-ne’e lian husi povu suku rua iha sub-rejiaun Pássabe”, dehan.
Hatán ba rekomendasaun ne’e, primeiru-ministru husu presiza promove unidade, halakon odíu no vingansa no tane malu nu’udar Oekusi-oan.
“La kle’ur tan, imi mak sei kaer rasik, maibé mak ne’e, labele haree ema ida nia hatais faru mean ka mutin ka kinur no matak. Tenke haree malu nu’udar Oekusi-oan, sukat nia kapasidade. Se nia serbisu karik sukat mós nia hahalok, se la’e rai ne’e sei la la’o ba oin, balun riku, povu ne’ebé terus, sei terus nafatin. Ida-ne’e ita lakohi, tenke serbisu maka’as no unidade”, Xanana apela.
Rekorde katak Primeiru-Ministru, Xanana Gusmão, hala’o vizita horisehik bá Oekusi atu halo diálogu ho komunidade sira no no diálogu dahuluk ne’e hahú ho populasaun sira iha sub-rejiaun Pássabe.
Iha kuarta-feira, 30 Abríl, kontinua halo diálogu ho populasaun sira iha suku Usitasa’e, Bobomento, no Usitaqueno, iha sub-rejiaun Oésilo.
Iha kinta-feira dadeer kontinua bá iha postu antigu Nítibe hodi halo diálogu ho komunidade suku lima mak hanesan Ban-Afi, Lela-Ufe, Usitako, Suni-Ufe no Bene-Ufe.
Notísia relevante: Aban, PM Xanana halo diálogu dahuluk ho komunidade iha Pássabe-Oekusi
Jornalista: Abílio Elo Nini
Editora: Maria Auxiliadora
