OEKUSI, 23 Abríl 2025 (TATOLI) – Eis-Prezidente Autoridade Rejiaun Administrativa Espesiál Oekusi Ambeno (RAEOA), Arsénio Paixão Bano, fó nia apoia bainhira Primeiru-Ministru, Kay Rala Xanana Gusmão, nomeia no hatudu Oekusi-oan atu lidera fali RAEOA no Zona Ekonómia Espesiál Dezenvolvimentu Oekusi Ambeno (ZEEDOA).
“Ha’u hein katak husi 2025 ba 2026 di’ak liutan, tanba ha’u-nia observasaun ne’e, autoridade atuál la’o ladun di’ak, la’os ha’u mesak mak ko’alia maibé ema hotu mós ko’alia, ne’ebé di’akliu Oekusi-oan mak lidera RAEOA no ZEEDOA, tanba ne’e mak Oekusi-oan sira, liuliu ha’u-nia maluk CNRT ho PD, presiza hamutuk ko’alia lista úniku ida- de’it, ne’e ha’u-nia sujestaun, ha’u apoia katak nomeia Oekusi-oan mak lidera, tanba tuir rezolusaun ne’ebé foin daudaun aprova iha Konsellu-Ministru klaru ona,” nia hateten iha Oekusi.
Notísia relevante:Veteranu sub-rejiaun Haksolok apoia rezolusaun Governu nomeia Oekusi-oan lidera RAEOA-ZEEDOA
Eis-Ministru MSSI ne’e, apoia mós Primeiru-Ministru molok hili no nomeia Oekusi-oan, presiza halo uluk konsultasaun públika, nune’e Oekusi-oan hotu bele kontribui ideia no rekomendasaun sira.
“Konsultasaun públika ne’ebé Primeiru-Ministru sei mai halo ida-ne’e di’ak, tanba munisipíu 12 ne’e ema husi sira-nia munisipíu rasik mak lidera sira-nia rain, tanba saida mak nomeia ema Oekusi ne’e presiza halo rezolusaun no konsultasaun públika, tan ne’e di’ak liu nomeia Oekusi-oan mak lidera nia rai rasik la presiza bolu tan husi munisipíu seluk,” nia dehan.
Tanba ne’e, nia espera no rekomenda ba futuru Prezidente Autoridade foun atu kontinua servisu obra ne’ebé autoridade anteriór husik hela, halakon diskriminasaun odíu no vingansa, maibé promove kooperasaun nu’udar Oekusi-oan, nune’e bele dezenvolve di’kliu rejiaun Oekusi Ambeno.
Rekorde fali katak, antes ne’e mós veteranu sira husi sub-rejiaun Haksolok, hala’o konferénsia imprensa hodi apoia rezolusaun Governu nian, no husu Primeiru-Ministru, Kay Rala Xanana Gusmão atu noméia Oekusi-oan rasik hodi lidera RAEOA no ZEEDOA.
Deklarasaun ofisiál ne’e, hato’o husi portavós veteranu sub-rejiaun Haksolok, António da Conçeição, ho naran kodégu ‘Mau Ki’ak Lifau’ iha suku Taiboko Oekusi.
Entretantu, antes ne’e Primeiru-Ministru, Xanana Gusmão, aprezenta projetu rezolusaun Governu kona-ba modelu Administrasaun Espesiál Rejiaun Administrativa Espesiál Oekusi Ambenu (RAEOA) no hetan ona aprovasaun iha Konsellu-Ministru.
Dokumentu husi Governu haktuir, objetivu husi rezolusaun ida-ne’e mak atu organiza, liuhusi konsulta ho populasaun lokál enklave Oekusi Ambenu, modelu foun ba administrasaun autoridade rejiaun nian, nune’e mós modelu zona ekonomia espesiál, ne’ebé tuir konstituisaun prevee ba rejiaun ne’e.
“Iha mós hanoin atu konsulta ho dirijente administrativu, autoridade lokál no sosiedade Oekusi Ambenu nian atu hili no dezigna entre sira, kona-ba sé maka sei bele ezerse mandatu administrativu sira rejiaun nian, iha autoridade no iha zona ekonómika espesiál”, nota ne’e dehan.
Notísia relevante:Xanana atualiza ba Xefe Estadu modelu Administrasaun RAEOA
Jornalista: Abílio Elo Nini
Editór: Florencio Miranda Ximenes
