OEKUSI, 28 Abríl 2025 (TATOLI) – Primeiru-Ministru (PM), Xanana Gusmão, to’o ona iha Rejiaun Administrativa Espesiál Oekusi Ambenu (RAEOA) no tuir planu sei halo diálogu dahuluk ho populasaun sira iha sub-rejiaun Pássabe.
“Rezultadu ohin ami enkontru ne’e, deside programa atu sai oinsá, ne’ebé aban ita sai husi Pante Makasar bá Pássabe atu ko’alia ho komunidade sira, depois kalan mai toba iha Oésilo”, Primeiru-Ministru relata ba jornalista sira, hafoin enkontru ho autoridade RAEOA no ekipa ZEEDOA, ohin.
Notísia relevante:Vizita Oekusi, lia-na’in sira simu Primeiru-Ministru ho kultura iha fronteira Sakato
Nia informa katak iha loron daruak, iha kuarta-feira 30 Abríl, kontinua halo diálogu ho populasaun sira iha suku Usitasa’e, Bobomento, no Usitaqueno, iha sub-rejiaun Oésilo.
Xefe Governu hatutan katak depoizde ramata diálogu iha Oésilo, iha parte lorokraik fila kedas bá toba iha Naktuka, sub-rejiaun Nítibe.
Iha kinta-feira dadeer kontinua bá iha postu antigu Nítibe hodi halo diálogu ho komunidade suku lima mak hanesan Ban-Afi, Lela-Ufe, Usitako, Suni-Ufe no Bene-Ufe.
“Bainhira ko’alia hotu ho komunidade sira mak mai fali toba iha Pante Makasar, ne’ebé aban ami hahú atividade”, Xanan adianta.
Notísia relevante: PM Xanana husu Oekusi-oan prepara-aan lidera RAEOA iha 2026
Primeiru-Ministru hala’o vizita ohin bá Oekusi liuhusi fronteira Sakato no simu ho kultura husi lia-na’in sira depois kontinua kedas hala’o enkontru ho Prezidente Autoridade RAEOA, Rogério Lobato, no ekipa ZEEDOA durante oras rua, hahú husi tuku 17h10 to’o tuku 19h00.
Jornalista: Abílio Elo Nini
Editora: Maria Auxiliadora
