OEKUSI, 28 Abríl 2025 (TATOLI) – Primeiru-Ministru, Xanana Gusmão, hala’o vizita bá Rejiaun Administrativa Espesiál Oekusi Ambeno (RAEOA), liuhusi fronteira terrestre no to’o ona iha Sakato iha tuku 16h10.
Iha fronteira Sakato, komunidade no lia-na’in sira simu Xefe Governu ho kultura povu Atoni-nian, lia-dadolin (takanab) husi suku Monemeko, hafoin ne’e kontinua simu ho bidu no tara tais.
Notísia relevante:Governu aprova modelu Administrasaun Espesiál RAEOA
“Benvindu señor Primeiru-Ministru, isin di’ak no saudavel. Ohin hakat mai atu vizita ita-boot nia povu sira iha rai-ketan Oekusi Ambeno”, lia-na’in sira hato’o liuhusi dadolin iha Sakato.
Aleinde ne’e, Prezidente Autoridade RAEOA, Rogério Lobato, kontente simu vizita xefe Ezekutivu no konvida hodi observa projetu sira-ne’ebé implementa iha suku no aldeia.
“Primeiru-Ministru mai vizita RAEOA tuir programa ne’ebé nia hato’o ona mai ita. Entaun, ita prontu simu nia. Hanesan autoridade sei lori nia bá to’o foho atu ba haree dezenvolvimentu ita halo daudaun. Depois, tuir nia programa sei hasoru malu ho komunidade atu rona rasik saida mak sira enfrenta”, Rogério Lobato informa.
Depoizde serimónia kulturál simu xefe Governu ne’e ramata, Prezidente Autoridade RAEOA ho Sekretáriu Rejionál sira hamutuk ho ekipa komisaun ZEEDOA konvida kedas Xanana kontinua viajen husi fronteira Sakato bá Oékusi Vila hodi deskansa, nune’e sei halo preparasaun ba konsulta públika nian iha tersa-feira.
Notísia relevante: Veteranu sub-rejiaun Haksolok apoia rezolusaun Governu nomeia Oekusi-oan lidera RAEOA-ZEEDOA
Antes ne’e, Primeiru-Ministru, Xanana Gusmão, aprezenta projetu rezolusaun Governu kona-ba modelu Administrasaun Espesiál Rejiaun Administrativa Espesiál Oekusi Ambenu (RAEOA) no hetan ona aprovasaun iha Konsellu-Ministru.
Dokumentu husi Governu haktuir, objetivu husi rezolusaun ida-ne’e mak atu organiza, liuhusi konsulta ho populasaun lokál enklave Oekusi Ambenu, modelu foun ba administrasaun autoridade rejiaun nian, nune’e mós modelu zona ekonomia espesiál, ne’ebé tuir konstituisaun prevee ba rejiaun ne’e.
“Iha mós hanoin atu konsulta ho dirijente administrativu, autoridade lokál no sosiedade Oekusi Ambenu nian atu hili no dezigna entre sira, kona-ba sé maka sei bele ezerse mandatu administrativu sira rejiaun nian, iha autoridade no iha zona ekonómika espesiál,”, nota ne’e dehan.
Jornalista: Abílio Elo Nini
Editora: Maria Auxiliadora
