Bankada FRETILIN nia komentáriu kona-ba nomeasaun PTR foun

DILI, 30 Abríl 2025 (TATOLI)–Deputadu Bankada Opozisaun husi Frente Revolusionária de Timor-Leste Independente (FRETILIN), Joaquim dos Santos, hato’o komentáriu Bankada liga ho desizaun Prezidente Repúblika (PR) nomea Prezidente Tribunál Rekursu (PTR) foun.
“Ita hotu asiste horiseik, Prezidente Repúblika nomea Afonso Carmona nu’udar Prezidente Tribunál Rekursu. Juíz Afonso Carmona daudaun ne’e ho kategoria segunda klase no halo knaar iha Tribunál Primeira Instánsia. Antes ne’e Prezidente Tribunál Rekursu mai husi Juíz sira ne’ebé hola parte iha Tribunál Rekursu, no Juíz ho kategoria primeira klase,” nia kestiona liuhusi konferénsia imprensa iha sala Bankada iha Parlamentu Nasionál (PN), Kuarta ne’e.
Bankada FRETILIN konsidera nomeasaun ne’e viola Konstituisaun.
“Nomeasaun ne’e mós sei harahun sistema justisa ne’ebé tau a’as sistema méritu no integridade órgaun judisial nian, no klaramente viola Konstituisaun,” nia akresenta.
Notísiarelevante : PR Horta husu PTR foun atu kontinua hametin konfiansa públika ba sistema justisa
Bankada Opozisaun ne’e nota katak nomeasaun ne’e mosu hahú ho alterasaun ba Lei Organizasaun Judisiáriu, ne’ebé aprezenta husi Governu ho karatér urjénsia.
“Iha proposta alterasaun ne’e, Governu husu atu muda kritéria ba PTR nian, bele mai husi Juíz sira iha kategoria ne’ebé de’it no husi Tribunál nível ida-ne’ebé de’it,” nia tenik.
Tuir Bankada, alterasaun ne’e viola Konstituisaun no tentativa viola prinsípiu separasaun poder no interdependénsia órgaun soberania sira ne’ebé kontempla iha artigu 69 Konstituisaun.
Notísiarelevante : PN aprova alterasaun Lei Organizasaun Judisiária iha finál globál
Nia hateten, kona-ba nomesaun PTR, Konstituisaun fó dalan klaru katak nomea husi Juíz sira ne’ebé hola parte iha Tribunál Rekursu, ne’ebé hanesan prátika aplikada husi antigu Xefe Estadu sira iha tempu liubá tanba interpreta artigu 124.°, n.° 3 husi Konstituisaun.
“FRETILIN kompromete atu lori alterasaun Lei Organizasaun Judisiária ba fiskalizasaun konstituisionalidade,” Deputadu hato’o.
Notísia relevante : Governu hato’o intensaun altera Lei Organizasaun Judisiária ba PN
Iha sorin seluk, Vise-Bankada Congresso Nacional de Reconstrução de Timor (CNRT), Patrocino dos Reis Fernandes, seidauk bele fó komentáriu ba deklarasaun husi Bankada FRETILIN kona-ba nomeasaun PTR viola Konstituisaun.
“Ha’u seidauk bele ko’alia tanba seidauk entende matéria ne’e, depois haree tiha mak bele fó komentáriu,” Prezidente Komisaun A iha PN trata asuntu Justisa no Konstituisionál ne’e hato’o.
Jornalista : Nelson de Sousa
Editora : Julia Chatarina

