VIKEKE, 05 Maiu 2025 (TATOLI)-Akontese ahin han uma ida iha área Bibileo, aldeia Babunak, suku Uma Ki’ik, postu Vikeke Vila, Munisípiu Vikeke ne’e deskonfia kauza husi sirkuitu liña eletrisidade.
Komadante Autoridade Protesaun Sivil (APC, sigla portugés) munisípiu Vikeke, Cirilio Soares Gomes, informa iha semana kotuk ahi han uma ida iha área suku Bibileo, ne’ebé kauza husi sirkutu liña eletrisidade nune’e uma referida ahi han moos laiha sasán uma laran ida mak salva.
“Akontese inséndiu ne’e akontese iha kalan tuku 12h00, ne’ebé ita la konsege salva tanba momentu akontese ne’e udan boot. Entaun, ita labele dezloka bá fatin akontesementu ahi han uma ne’e. Tuir dadus, ekipa APC rekolla ne’ebé ahi han uma ne’e kauza mai husi sirkuitu liña eletrisidade mak afeta ba uma,” Cirilio Soares Gomes hateten ba Agência TATOLI, iha postu Vikeke Vila, ohin.
Komadante APC Vikeke ne’e hatutan, vítima afetadu ne’e APC halo ona verifiksaun ba uma ho tipu kategoria estragu totál nomós APC Vikeke apoia ona pakote emerjénsia ba vítima inséndiu referida.
“Horisehik ami halo ona verifikasaun no apoia ona pakote emerjénsi kompostu husi foos, biskuit, supermie, sardine, bikan, kanuru, sana ba vítima sira hodi auguenta moris. Vítima afetadu uma-kain ida ho totál membru família hamutuk na’in-tolu (3),” nia dehan.
Akontesementu ahi han uma ne’e, nia husu Eletrisidade de Timor Leste, Empreza Públika (EDTL, E.P) hodi halo sensibilizasaun ba komunidade kona-ba utilizasaun liña eletrisidade tanba komunidade mak ladún tau atensaun ba utilizsaun eletrisidade.
“Tan ne’e, ami husu ba parte EDTL presiza halo sensibilizasaun ba ita-nia komunidade, atu sira bele hatene. Ita-nia komunidade uza fiu la tuir estandar, entaun bele akontese ahi han uma. Ho ida-ne’e, ba oin, tenke halo sensibilizasaun ba komunidade, karik uma-na’in laiha kapasidade liga eletrisidade kontaktu ba EDTL hodi ajuda instala fiu ba uma laran,” nia hateten.
Tuir dadus, APC Vikeke rejista kauza eletrisidade han uma iha tinan 2025 hamutuk uma tolu (3), uma ida iha suku Babul, postu Uatulari, ida iha suku Caraubalu, postu Vikeke Vila no suku Uma Ki’ik postu Vikeke Vila.
Jornalista : Vitorino Lopes da Costa
Editór : Cancio Ximenes
