DILI, 08 Maiu 2025 (TATOLI) – Ministru Petróleu no Rekursu Minerál, Francisco da Costa Monteiro, informa katak konkursu internasionál ba projetu Tasi-Mane loke ona no empreza internasionál lubun ida mak foti ona formuláriu.
“Projetu Tasi-Mane daudaun konkursu la’o ona, ánimu barak tebes husi kompañia internasionál. Sira ne’ebé foti dokumentu ba projetu Suai Supplay Base ne’e mais de kompañia 70 no sira ne’ebé foti dokumentu ba autoestrada liu 35”, Francisco Monteiro informa ba Tatoli, iha Palásiu Governu, Dili.
Tuir website Konsellu Nasionál Aprovizionamentu (CNS, sigla portugés), konkursu públiku ba projetu Suai Supplay Base hahú lansa iha loron 23 Abríl no sei termina iha 01 Jullu 2025 no projetu ba autoestrada husi Zumalai to’o Natarbora loke iha loron 03 Abríl no sei termina iha 08 Jullu 2025.
Lembra katak iha loron 09 to’o 12 Abríl 2025, Governu halo sosializasaun kona-ba Projetu Autoestrada ba komunidade afetada hahú husi Zumalai to’o Natarbora, tanba sira-nia rai ektare 1.529 mak afeta husi konstrusaun autoestrada ne’e.
Iha inísiu konstrusaun ba autoestrada iha kilométru 176, maibé hafoin halo ajustametu, koinsidénsia ho mudansa estratéjika ba konstrusaun Planta TLNG husi Beasu bá Natarbora, mak fixa konstrusaun kilométru 110, ne’ebé kilometru 30 husi Suai bá Kovalima ne’ebé konklui ona no prevee atu konstrui tan kilómetru 70-resin, hodi fahe ba sesaun tolu no kada sesaun konstitui husi kilométru 25-resin.
Notísia relevante: https://tatoli.tl/2025/04/04/sosializasaun-no-konsulta-publika-ba-projetu-tasi-mane-hahu-semana-oin/
Lembra katak, iha 07 Marsu 2025, Konsellu Ministru autoriza Ministériu Petróleu no Rekursu Minerál halo despeza relasiona ho programa kona-ba implementasaun Projetu Tasi-Mane iha Kosta Súl nasaun nian ho montante $40.500.000.
Notísia relevante: Konkursu internasionál ba Projetu Tasi-Mane lansa iha tempu badak
Jornalista: Arminda Fonseca
Editora: Maria Auxiliadora
