DILI, 13 Maiu 2025 (TATOLI) – Ministériu Administrasaun Estatál (MAE) sei organiza espozisaun nasionál ba dezenvolvimentu lokál iha Portu Dili. Atividade referida sei halo abertura iha loron 15 fulan-Maiu 2025 no munisípiu hotu, obrigatoriamente, sei partisipa ho másimu.
Nune’e jornalista TATOLI halo entrevista ho Prezidente Autoridade Munisipál (PAM) balun kona-ba sira-nia preparasaun atu partisipa iha espozisaun nasionál ne’ebé MAE organiza ne’e.
Prezidente Autoridade Munisipál Ermera, José Martinho dos Santos Soares informa katak munisípiu Ermera sei prepara grupu rua hodi partisipa espozisaun nasionál, ne’ebé organiza hosi MAE. Grupu rua ne’e mak hanesan grupu dansa kultura no ida seluk mak sei destaka funsionáriu na’in-haat hodi hein stand Ermera nian, nune’e bainhira ema ruma husu pergunta no klarifikasaun kona-ba sasan no dadus sira iha stand ne’e sira bele esplika.
“No, materia aprezentasaun ba dezentralizasaun nian ami hatama hotu ona ba tékniku MAE nian nune’e bele publika”, autoridade ne’e informa.
Líder munisipál ne’e esplika, matéria aprezentasaun ne’e mak hanesan estrutura munisipál, programasaun, númeru populasaun, programa dezentralizasaun, potensialidade iha munisípiu, programa preparasaun ba poder lokál nian no vantazen inklui desvantazen sira.
“Ermera Munisípiu ne’ebé prontu atu hakat ba poder lokál maske iha kestaun problemátika balun maibé ne’e la’ós impedimentu no bainhira ami tama ba poder lokál ne’e ami bele hadi’a buat hotu tuir estandarnizasaun ne’ebé iha”, Prezidente autoridade ne’e garante.
Problema sira ne’e, tuir autoridade másima Ermera ne’e mak hanesan, dahuluk, tenke halo rekrutamentu ba rekursu umanu ne’ebé seidauk prienxe ba vaga hotu-hotu, daruak mak fasilidade ba parte insfraestrutura nian no datoluk presiza formasaun ba diresaun xefia sira ho kualidade para halo jestaun ba servisu hotu-hotu.
“Agora daudaun nesesáriu mak ne’e konstrusaun ba edifísiu kámara munisipál ho merkadu munisipál inklui asembleia munisipál,” nia konsidera.
Iha parte seluk, Prezidente Autoridade Munisipál (PAM) Bobonaru, Alexandre Pires haktuir katak Governu liuhusi Ministériu Administrasaun Estatál (MAE) orienta autoridade munisípiu sira hotu katak tinan ida-ne’e sei iha espozisaun feira nasionál no munisípiu hotu obrigadu atu partisipa.
“Entaun tanba ida-ne’e feira nasionál ninian, ita hanesan autoridade no ita sei envolve ita-nia aan iha ne’ebá tanba ita munisípiu Bobonaro mós asegura iha stand ne’ebé komisaun organizadora sira prepara ona”, autoridade munisipál ne’e informa.
Nune’e sira mós estabelese ona komuniasaun organizadora iha munisipál ninian no sei fahe ba grupu rua – grupu ida atu haree iha nivél munisípiu nian no grupu ida ba hein iha stand ne’ebé harii iha portu Dili ne’e.
“Aprezentasaun ba iha stand ne’ebé ita prepara ne’e mak ita sei tau produtu lokais sira, atributu tradisionál sira, dansa tradisonál hanesan likurai husi grupu rua no sei hatudu mós vídio kona-ba progresu dezenvolvimentu husi munisípiu Bobonaro nian”, líder munisipál ne’e hateten.
“Progresu dezenvolvimentu sira hanesan infraestrutura estrada, eskola, postu saúde, irigasaun no edifísiu sira-ne’e ita lori ba aleinde vídio ita mós sei expo kona-ba obra fotográfia sira,” nia akresenta.
Entretantu totál orsamentu ne’ebé MAE distribui hodi apoia preparasaun ba kada munisípiu sira iha atividade feira nasionál ne’e kada munisípiu hetan orsamentu $7 mil durante loron lima; hahú husu loron 15-20 fulan-Maiu 2025 hodi selebra mós ba loron nasionál Restaurasaun independénsia nian.
Jornalista: Alexandra da Costa
Editór: Rafael Ximenes de A. Belo
