DILI, 16 Maiu 2025 (TATOLI)—Sarani hosi Parókia Santa Terezinha do Menino de Jesus Ossu, Rosa Guterres Monteiro, sente lakon Amu-Lulik di’ak ida hanesan Padre Domingos Soares Maubere, tanba durante tinan sia Padre Domingos hala’o kna’ar saserdotál iha Suku Ossu de Cima, Postu Administrativu Ossu, Munisípiu Vikeke.
“Hafoin rona novidade katak Amu Domingos Maubere laiha ona mundu, ha’u sente hakfodak no hanoin durante nia hala’o misaun iha Ossu tinan sia (9) nia laran,” Rosa Guterres dehan ba jornalista sira iha Mortuáriu Hospital Nacional Guido Valadares (HNGV), Bidau, sesta ne’e.
Nia haktuir, durante ne’ebá Padre Domingos Maubere hatudu hahalok di’ak tebes iha sarani sira nia leet, no hanorin sarani sira oinsá mak hadomi ema seluk tuir Nai Maromak nia ukun-fuan.
“Amu nia hahalok di’ak tebes. Nia siak mós nia laran moos ba labarik, joven, feto no mane no nia hadomi sarani hotu. Amu Maubere ema matenek, nia jeitu atu hanesan ho Amu Manuel Luís. Ami Ossu sente lakon-boot Amu-Lulik di’ak ida. Amu Maubere hanorin ema oinsá mak hadomi labarik, joven, ferik, katuas no tama-sai uma haree sarani sira,” nia informa.
Notísia relevante: Padre Domingos Maubere hakotu ona iis
Iha fatin hanesan, Sarani Teresa do Santos husi Parókia Letefoho, sente lakon-boot, tanba Amu Maubere iha tempu Indonézia lori joven sira husi fatin ida bá fatin seluk hodi luta ba kauza ida, nia lakohi ema ida lakon iha nia liman laran no buat hotu-hotu nia halo to’o Timor ukun-aan.
Nia haktuir dalaruma tempu ne’ebé mak susar tebetebes maibé nia kontinua enkoraja joven sira atu kontinua reza ba rai ida-ne’e, kontinua lori joven sira tuir Kruzada, tuir Joven Ba Kristu tanba hanesan sarani labele haluha hun husi moris ne’e.
Jornalista: Felicidade Ximenes
Editór: Xisto Freitas da Piedade
