DILI, 21 Maiu 2025 (TATOLI) — Ministériu Agrikultura, Pekuária, Peska no Floresta (MAPPF), liuhusi Sekretariu Estadu Peska (SEP), planeia harii sentru deskarregamentu iha suku Tibar, postu administrativu Bazartete, munisípiu Likisá.
Sekretáriu Estadu Peska, Domingos da Conceição dos Santos, esplika, objetivu atu harii deskarregamentu ne’e atu evita peskadór sira-ne’ebé kontinua peska ba espésie tasi nian ne’ebé Estadu bandu.
Nia dehan, atu harii deskarregamentu ikan ne’e, daudaun ministériu hanoin ona atu tau ponton iha-ne’ebá, ida-ne’e hanoin atu ró peska sira-ne’ebé parte tasi ibun bele konsentra hotu iha ne’ebá atubele sai organizadu.
“Ita hanoin atu tau uluk ponton iha-ne’ebá atu ró sira ho medida 5 to’o 10 Gross tonnage [GT] ne’e oinsá bele konsentra hotu iha-ne’ebá halo deskarregamentu iha-ne’ebá tau kedas lotas peska atu indentifika espésie sira-ne’ebé mak ita autoriza no la autoriza ba halo atividade kapturasaun ka peska ne’e. Tanba laiha fatin deskarregamentu dalaruma ita-nia espésie sira-ne’ebé mak ita bandu ita-nia peskadór sira halo kapturasaun tuir sira-nia hakarak, la bazeia ba orientasaun ne’ebé mak hatuur iha lei,” Domingos da Conceição dos Santos ba Tatoli, kuarta ne’e.
Nia subliña, bainhira espésie hirak-ne’ebé Governu bandu atu labele estraga, mak nia dezenvolvimentu bele la’o di’ak, liuliu hanesan ahu-ruin no animál tasi sira, ida-ne’e Governu bandu atu kasa.
Nia hateten, bainhira deskarregamentu ikan nian iha ona mak bele hatene produsaun ikan mensál, anuál ne’e hira, bele identifika sufisiente ona ka lae, atu fornese demanda nasionál nian ne’e.
“Bainhira ita haree demanda nasionál di’ak ona hanoin ba futuru bele halo esportasaun, maibé provizoriumente ita tau ona mini merkadu iha Kaitehu nian atu ikan sira mai konsentra hotu iha ne’ebá, kuidadu nia ijienidade ikan nian molok atribui ba konsumidór sira,” nia dehan.
Nia akresenta, atu harii deskarregamentu ikan ne’e daudaun ministériu sei haree hela kbiit finanseiru sira ne’ebé mak projetu sira ministériu nian halo reapropriasaun ne’e, osan restu sira iha bele koloka ba planu ne’e.
“Tanba teknikamente ita halo ona levantamentu atu define montante hira mak ita presiza atribui ba,” nia konklui.
Jornalista : Arminda Fonseca
Editór : Evaristo Soares Martins
