KOVALIMA, 23 Maiu 2025 (TATOLI) – Juís Administradór Tribunál Munisípiu Kovalima, Naasson Doutel Sarmento, relata katak andamentu prosesu kazu sívil lentu iha Tribunál Munisípiu Kovalima, tanba falta rekursu umanu.
“Ita iha juís krimi mak na’in-haat, maibé juís ba kazu sívil na’in-ida de’it. Ida-ne’e mak ita hasoru difikuldade nune’e halo andamentu lentu, tanba falta rekursu. Nune’e, ita presiza atu aumenta juís iha área kazu sívil nune’e halo atendementu prosesu ho lais”, Juís Administradór Tribunál Munisípiu Kovalima, Naasson Doutel Sarmento, informa ba jornalista, iha Tribunál munisípiu Kovalima, ohin.
Ho problema ne’ebé mak Tribunál Munisípiu Kovalima hasoru hanesan juís administradór Kovalima, submete ona pedidu ba iha Prezidente Tribunál Rekursu atu aumenta juís ba kazu sívil.
“Molok ne’e, ami submete ona pedidu ba iha prezidente Tribunál rekursu, presiza atu aumenta juís ba kazu sívil na’in-rua ka tolu di’ak liután nune’e halo atendementu prosesu kazu sívil ho lais ba prosesu sívíl ne’ebé mak durante ne’e pendente”, nia haktuir.
Tuir dadus, entre Janeiru-Abríl 2025, totál kazu krime ne’ebé pendente 339 ba kazu sívil prosesu pendente 181 kompara ho 2023-2024 kazu pendente hamutuk 800-resin maibé Abríl 2025 ne’e kazu krime 339 kazu sívil 181.
Mekanizmu redús kazu pendente, Tribunál Munisípiu Kovalima liuhusi atividade julgamentu tuir ajenda ne’ebé marka iha Tribunál primeira instánsia munisípiu Kovalima no mós hala’o atividade Tribunál movél iha munisípiu sira bazeia ba oráriu ne’ebé mak iha.
“Ita sempre halo planu munisípiu sira hanesan munisípiu Bobonaro, Ainaro no Manufahi maibé iha 2023-2024 ita hala’o atividade Tribunál movél foku iha munisípiu Bobonaro tanba haree husi grafiku krime ne’ebé mak rejista iha Tribunál ho númeru aas”, nia informa.
Autoridade judisiál ne’e dehan, kazu barak liu husi munisípiu Bobonaro – rejista krime kontra bandu, krime Violénsia Doméstika aas, atividade Tribunál movél foku ba kazu ne’ebé mak iha. Realiza atividade Tribunál movél ba prosesu 44 ne’ebé durante semana ida hodi hala’o julgamentu ba krime hanesan kontra bandu Violénsia Doméstika no krime abuzu seksuál ba menór ne’ebé nia númeru aas.
Tribunál Munisípiu Kovalima atu hala’o atividade Tribunál movél submete proposta ba Prezidente Tribunál Rekursu hanesan mós prezidente Konsellu superiór Majislatura Judisiál hodi aprezenta planu tribunál movél kada fulan semana ida ne’ebé míminu lori prosesu 30 másimu 60 bainhira julgamentu hetan aprovasaun nune’e foti desizaun kedas.
“Planu ita halo dezlokasaun Tribunál movél durante semana ida. Ne’ebé, hahú Segunda to’o Sesta hodi hala’o julgamentu rutina full (kumpletu) iha semana ida tomak iha munisípiu sira,” nia hato’o.
Notísia relevante:Tribunál Kovalima kontribui reseita rihun 28-resin ba kofre Estadu
Jornalista:Celestina Teles
Editór: Rafael Ximenes de A. Belo
