Autoridade Vikeke sei hasai sikulár komunidade labele husik animál la’o livre
VIKEKE, 27 Maiu 2025 (TATOLI)—Prezidente Autoridade Munisípiu (PAM) Vikeke, Francisco C.S de G. Soares, informa sei konvoka autoridade suku sira molok hasai karta sirkulár ba komunidade atu labele husik animál la’o livre iha sidade laran.
“Ami forma uluk ona ekipa toponímia iha munisípiu. Iha tempu badak, ita sei konvoka enkontru ho xefe suku 38 para ita bele rezolve animál sira-ne’ebé husik livre sira-ne’e, atu komunidade labele husik animál la’o livre ba-mai,” Francisco C.S de G. Soares hateten ba jornalista sira, iha postu Vikeke, ohin.
Autoridade fó ona orientasaun ba Diresaun Jestaun Merkadu no Turzsmu (DJMT) munisípiu Vikeke hodi haree ba asuntu animál sira-ne’ebé husik livre.
“Ha’u fiar katak, fulan-Juñu, ita bele rezolve ona asuntu animál livre sira-ne’e no ita sei deklara ba públiku tomak iha munisípiu Vikeke hodi animál labele husik livre. Tan ne’e, ita sei implementa tuir dalan dekretu-lei sira-ne’ebé ita iha la pirmite animál sirkula livre,” nia hateten.
Nune’e, nia dehan, bainhira hasai ona sirkulár mak komunidade kontinua husik sira-nia animál la’o livre mak autoridade sira sei foti medida ruma.
“Medida mak ne’e, oho animál sira-ne’ebé sikula livre, atu bibi ka karau ka fahi ne’ebé la’o livre iha estrada públiku sira. Ne’ebé, ita fó sai sirkulár, xefe suku sira mak sei implementa rigór tuir ida-idak ninia maneira,” nia dehan.
Iha fatin seluk, administradór postu Vikeke Vila, Leopoldo da C. Alves, haktuir kona-ba animál la’o livre ne’e, postu preparadu hodi implementa iha postu Vikeke Villa, importante autoridade munisípiu hasai ona karta sirkulár ba pa postu sira.
“Ita prontu haree animál livre sira-ne’e. Ami hein de’it karta sirkulár husi PAM. Kuandu karta sirkulár sai, ita sei hatutan ba ita-nia komunidade liuliu iha Vikeke Vila, labele husik animál la’o livre iha sidade laran,” nia hateten.
Antes ne’e, Dekretu-lei nu.12/2014 kona-ba retrisaun movimentu tráfiku animál iha área urbana ne’e prodús iha 2014.
Jornalista : Vitorino Lopes da Costa
Editór : Cancio Ximenes
