Juñu, Empreza Bobometo hahú konstrui ponte Oébaha
OEKUSI, 28 Maiu 2025 (TATOLI) – Diretór Diresaun Rejionál Infraestrutura (DRI), Remígio Nuno Sila, informa katak materiá atu konstrui ponte Oébaha, kompañia Bobometo Unipesoál Lda, importa ona husi nasaun viziñu to’o ona armazein no tuir planu sei monta ponte referidu iha fulan Juñu 2025 ne’e.
“Materiál sira arrampu multi-plate, kompañia ordér husi Jakarta, destaka ona iha armazein kompañia agora nia prosesu inisíu mak kompañia hahú halo leveling ka kee rai atu monta ponte ne’e, nune’e kompañia hahú prepara ona nia fatin no progresu fíziku agora atinje ona 24%, tanba rezultadu fiskalizasaun tuir planu iha Juñu agora ita hahú monta,” dehan Remígio Nuno Sila, ba jornalista sira iha Oekusi, ohin.
Notísia relevante:Komunidade Oébaha husu Rogério Lobato kumpre promesa harii ponte iha Paut
Ponte Oébaha kategória projetu emerjénsia aprova husi Konsellu Administrasaun Fundu Infraestrutura (KAFI) daruak, kompleta kedas ho gabiun metru 335, ne’ebé daudaun ne’e atu tama ba finalizasaun.
“Gabiun ne’e importante pakote ida atu harii ponte Oebaha, ne’ebé nia progresu hela itoan de’it atu tama ba finalizasaun,” nia informa.
Notísia relevante:Empreza Bobometo ladauk konstrui Ponte Oébaha
Iha fatin hanesan, Jestór sub-rejiaun Oésilo, Benedito Ulan, sujere presiza aselera, tanba ponte ne’e alternativa atu fasilita transporte no komunidade sira iha tempu udan.
“Ha’u-nia esperansa ponte ne’e tenki la’o, atu fasilita movimentu transporte no komunidade sira liuliu iha tempu udan, tanba ponte ne’e sei liga ba ponte Bitopa, fasilita komunidade suku tolu iha Oésilo, Nítibe sorin hanesan suku Ban-Afi, Lela-Ufe, no mós suku rua iha sub-rejiaun Pássabe, tanba ponte ne’e alternativa atu asesu tam aba Pante Makasar Oekusi vila,” nia orgullu.
Entretantu, ponte Oébaha lokaliza iha bairru Paut aldeia Oébaha suku Bobometo sub-rejiaun Oésilo, nu’udar dalan alternativa atu liga bá sub-rejiaun Oésilo, Pássabe inklui Nítibe.
Kontrusaun ponte Oébaha ezekuta husi kompañia lokál Bobometo Unip, Lda ho valór kontratu $841,871.06, Autoridade RAEOA aloka husi Orsamentu Jerál Estadu (OJE) 2025.
Notísia relevante:Rogério Lobato orienta DRI prepara BoQ hodi konstrui ponte iha Oébaha
Jornalista: Abílio Elo Nini
Editór: Florencio Miranda Ximenes
