DILI, 28 Maiu 2025 (TATOLI) – Ministériu Solidaridade Sosiál no Inkluzaun (MSSI) aprezenta ezekusaun Orsamentu Jerál Estadu (OJE) 2025 iha trimestre dahuluk nian ba Komisaun C Parlamentu Nasionál ne’ebé trata Asuntu Finansa Públika.
Hafoin audiénsia, Vise-Ministra Solidaridade Sosiál no Inkluzaun, Céu Brites, hateten iha trimestre dahuluk MSSI foin ezekuta 6,1% husi orsamentu alokadu hamutuk $26.188.602.
“Maibé ita haree no konta hahú husi Janeiru to’o Maiu, MSSI ezekuta ona 18,6%. Ita haree ba totál orsamentu ezekutadu ein termu osan $4.452.882,11”, Céu Brites hateten iha sala konferénsia Parlamentu Nasionál, ohin.
Nia esplika ezekusaun orsamentu MSSI nian sei ki’ik, tanba pagamentu ba Programa Bolsa da Mãe Kondisionál seidauk halo, tanba nia pagamentu tinan ida halo dala ida. Entaun, pagamentu ne’e sei halo iha Juñu 2025 ho totál benefisiáriu 68.896.
Tuir nia, orsamentu ne’e MSSI sei tranfere ba Banku Nasionál Komérsiu Timor-Leste (BNCTL) mak sei halo pagamentu.
Nia esplika mós katak ezekusaun orsamentu iha trimestre dahuluk ne’e barak liu ba saláriu no vensimentu, bens no serbisu, transferénsia públika, maibé ba kapitál menór seidauk ezekuta tanba sei iha prosesu tranzisaun hela ne’ebé envole mós konkursu públiku.
“Kapitál dezenvolvimentu semana kotuk ita foin lansa fatuk dahuluk atu harii sentru solidaridade munisípiu Bobonaru nian, iha Maliana, ne’ebé ezekusaun sira sei ki’ik”, dehan.
Nia adianta katak durante ezekuta OJE laiha problema ka dezafiu ruma tanba tuir duni planu no programa ne’ebé iha.
Iha biban ne’e, Vise-Ministra Solidaridade Sosiál no Inkluzaun ne’e mós hato’o kona-ba pagamentu ba idozu faze daruak nian ne’ebé sei hala’o iha Jullu tinan ne’e ho totál benefisiáriu rihun 120. MSSI mós halo tranferénsia orsamentu bá Institutu Nasionál Solidaridade Sosiál (INSS) hamutuk millaun $1,4.
Nia akresenta, iha audéndsia ne’e, Komisaun C rekomenda ba MSSI kontinua ezekuta OJE ho loos no sinkroniza loloos dadus ba ema ho defisiénsia, idozu no seluk tan ne’ebé MSSI halo pagamentu.
Lembra katak OJE 2025 ne’ebé aloka ba MSSI hamutuk $26.188.602 no destina ba saláriu no vensimentu $3.982.088, bens no serbisu $10.744.951, transferénsia públika $9.501.672, kapitál menór rihun $500 no kapitál no dezenvolvimentu $1.459.891.
Orsamentu ne’e finansia Programa Funsionamentu no Dezenvolvimentu Institusionál ho subprograma haat no atividade 29.
Jornalista: Arminda Fonseca
Editora: Maria Auxiliadora
