KOVALIMA, 28 Maiu 2025 ( TATOLI) – World Vision hamutuk Fokupers no Fundasaun Esperansa Enklave Oe-kusi (FEEO) loke oportunidade kompetisaun negósiu ho kategória negósiu mikro empreza (ki’ik) no mikro indústria (ki’ik) iha Munisípiu Kovalima.
Kompetisaun ne’e foku ba área sira hanesan Turizmu ho konsentrasaun ba iha artezanatu inklui ho resiklajen no Agrikultura foka ba produtu lokál sira.
Durante ne’e, World Vision implementa programa promosaun Feto liuhusi empoderametu ekonómia ka (Power) ne’ebé implementa iha Postu administrativu Zumalai , Tilomar no Fohorem maibé la taka dalan mós ba postu administrativu sira seluk atu bele submete dokumentu hodi tuir kompetisaun referida.
Rekizitu ba kompetisaun ne’e mak hanesan idade 35 mai kraik, tenke Kovalima-oan, tenke iha konta bankaria grupu ka individuál, prontu tuir treinamentu no karta apoiu husi Xefe aldeia/Suku.
Notísia relevante:World Vision implementa programa foun Hakbiit Ekonomia Família iha Tilomar-Zumalai
Administradór Postu Tilomar, Venancio Sarmento, prontu atu apoia grupu sira tuir kompetisaun ne’ebé mak ONG internasionál hodi fó oportunidade ba grupu.
“Ha’u sei konfirma ho grupu iha suku sira hodi halo preparasaun relasiona programa ne’ebé mak World Vision atu realiza iha Kovalima. Ami sei halo preparasaun ne’ebé mak di’ak tuir kritéria husi Word vision”, Autoridade postu Tilomar Venansio Sarmento dehan ba jornalista sira, iha salaun AMC, ohin.
Kompetisaun ida-ne’e fó benefisiu ba komunidade sira foku ba feto hodi bele ajuda grupu bele dezenvolve di’ak liu no kompetisaun ne’e rasik sei hahú iha Juñu ne’e .
Ho nune’e grupu hotu presiza kumpri regra tanba kompetisaun ida-ne’e nakloke ba hothotu nune’e prepara.
Responsavel Fokupers Kovalima, Maria Madalena do Carmo husu ba grupu ka individuál ne’ebé mak tuir kompetisaun ne’e mantein no kolabora servisu ho parseiru ONG internasionál World Vision.
“Ita presiza atu kolobora ho ita-nia parseiru, tenke kolobora implementa, tenke tuir objetivu ne’ebé iha no la’o ho di’ak tanba programa ne’ebe bele fasilita ita hodi hala’o negósiu”, nia fó hanoin.
Notísia relevante:Vendedór 25 simu sertifikadu kona-ba Jestaun Estratéjia Negósiu
Jornalista:Celestina Teles
Editór: Rafael Ximenes de A. Belo
