OEKUSI, 29 Maiu 2025 (TATOLI) – Ekipa husi Programa Nasionál Dezenvolvimentu Suku (PNDS), Rejiaun Administrativa Espesiál Oekusi Ambeno (RAEOA) aprova ona projetu rua, nu’udar prioridade ba 2025 atu implementa iha suku foun Monemeko no Kutete sub-rejiaun Pante Makasar.
Notísia relevante:MAE pose xefe suku eleitu Kutete no Monemeko iha Oekusi
Diretór PNDS Oekusi, João Bobo, informa tuir matadalan PNDS, katak prosesu atu define prioridade iha suku, komunidade sira mak propoin direita no ekipa PNDS fasilita de’it.
“Levantamentu ita finaliza ona, hahú husi rekolla prioridade tanba komunidade propoin mai, nune’e lokasi ita identifika ona katak iha suku foun rua ne’e ita konklui ona sira-nia programa prioridade iha PNDS 2025, mak reabiliasaun estrada rabat beton, ne’ebé ami ba fasilita de’it. Entaun ami aprova no submete ona ba nasionál atu tranferese sira-nia orsamentu ba projetu rua ne’e,” João Bobo, ba jornalista sira iha Oekusi, ohin.
Nia informa, to’o agora projetu rua ne’e seidauk ezekuta tanba sei hein prosesu transferénsia orsamentu husi Ministériu Administrasaun Estatál (MAE), lahanesan ho suku 18 nia orsamentu prevista kedas iha Planu Asaun Anuál (PAA) ba PNDS 2025 nian, tanba suku rua referidu foin eleitu iha tinan ne’e, no presiza ofisiál finansa ida iha suku, nune’e MAE bele fasil transfere osan ba konta bankária suku.
Nia hateten, projetu reabilitasaun estrada rabat-beton ne’e, tuir dadus estimasaun husi tékniku PNDS katak iha suku Monemeko sei gasta rihun $42 ho distánsia kilómetru rua no suku Kutete sei gasta rihun $44 ho distánsia metru-800.
Notísia relevante:Tinan ne’e, PNDS Oekusi implementa projetu 25 ho kustu rihun $900-resin
Iha fatin hanesan, Jestór sub-rejiaun Pante Makasar, Lorencio da Cunha, husu Autoridade RAEOA bele halo ona rekrutamentu ba pesoál apoia suku, nune’e bele fasilita transferénsia osan ba konta bankária suku nian.
“suku rua ne’e presiza mak estrada tanba bee-moos ita haree laiha problema. Maibé ami triste uitoan tanba Autoridade RAEOA seidauk halo rekrutamentu ba pesoál apoia finansa iha suku,” nia dehan.
Entretantu, kona-na planu rekrutamentu ba pesoál apoia suku, antes ne’e, Sekretáriu Rejionál ba Asuntu Administrasaun, Andre La’o, informa sei hein despaixu ofisiál husi Prezidente Autoridade RAEOA, nune’e bele loke konkursu públiku ba rekrutamentu pesoál apoia suku na’in-ualu.
Tuir Adre La’o, katak, ofisiál na’in-ualu ne’e atu koloka ba suku Monemeko na’in-haat ho Kutete na’in-haat, ho funsaun atu apoia servisu administrasaun suku, asuntu finansa no sosiál nian.
Notísia relevante:Autoridade RAEOA planu rekruta ofisiál suku na’in-ualu ba Monemeko-Kutete
Jornalista: Abílio Elo Nini
Editór: Florencio Miranda Ximenes
