DILI, 29 Maiu 2025 (TATOLI)—Sekretaria Estadu Formasaun Profisionál no Empregu (SEFOPE), kinta ne’e, asina kontratu ho grupu auto-empregu hamutuk 15 husi munisípiu 13 inklui Rejiaun Administrativa Espesiál Oekusi Ambenu (REAOA).
Sekretáriu Estadu Formasaun Profisionál no Empregu, Rogério de Araújo Mendonça, apresia autoridade munisípiu sira-ne’ebé mak iha kompromisu boot tebes hodi akompaña asinatura kontratu grupu auto-empregu sira.
“Tinan barak ami apoiu auto-empregu, maibé balun rona SEFOPE loke avizu ba grupu auto-empregu, sira hareee idak-idak lori ona sira-nia karta bá autoridade lokal asina, depois lori mai. Maibé, banhira ekipa téknika sira bá to’o iha fatin, la eziste kondisaun di’ak. Tanba ne’e, Governu presiza estabelese filafali kondisaun ne’ebé mak servisu hamutuk ho autoridade sira hotu no servisu hamutuk ho Komisaun Antí Korrupsaun nune’e osan ne’ebé mak atu fó sira uza duni ba negósiu. Ida-ne’e mak polítika Governu hodi promove no kriasaun empregu ba ita-nia sidadaun,” Rogério dehan iha ámbitu asinatura kontratu, iha salaun SENAI, Bekora.
Auto-empregu ne’e halai liubá iha atividade ortikultura, karpintária, haki’ak ikan, ofisina, restorante, prodús tahu-tempe, prodús batako no prodús mina-nuu.
Orsamentu ne’ebé apoia ba grupu auto-empregu ho montante $40.211 kompostu husi Grupu Baldes benefísia $2.282.00, Ronoze $2.090.00, Bariudu Lau $3.190.00, Grihelzes $3.360.00, Funan $2.615.00, Rini Rina Lonkulo $2.140.00, Joluciairenia Nofian $2.308.00, Nunsloet $3.540.00, Aglu Lefu $ 3.115.00, Emafefatma $1.690.00, Bedotochano $2.839.00, T3 Viegas $ 3.325.00, Bolu Teinae $ 2.787.00, Lifau $ 2.200.00 no Nelsoija $ 2.370.00.
Iha fatin hanesan, Diretór Jerál SEFOPE, Carlito do Rosário, hateten programa auto empregu ida-ne’e programa anuál ne’ebé kada tinan sempre apoiu ba grupu sira-ne’ebé mak hakarak halo atividade iha área rurál sira.
SEFOPE enkoraja benefisiáriu sira atu responsabiliza apoiu ne’ebé SEFOPE atribui, katak tenke uza orsamentu ne’e ba duni atividade relevante.
Aleinde ne’e, Adjuntu Komisáriu Komisaun Antí Korrupsaun, Rosário Salsinha de Araújo, dehan auto-empregu nu’udár meiu ida-ne’ebé politikamente ho kondisaun brillante husi SEFOPE, laiha tendénsia korrupsaun, koluzaun no nepotizmu iha prosesu selesaun.
Jornalista: Felicidade Ximenes
Editór: Xisto Freitas da Piedade
