DILI, 04 Juñu 2025 (TATOLI)-Sekretáriu Estadu asuntu Veteranu, César dos Santos da Silva “Merak”, informa to’o agora ekipa kontinua halo’ot verifikasaun ba dadus rejistadu veteranu 2003, 2009 inklui pendente sira.
“Lista reklamasaun husi 13 munisípiu hamutuk rihun 61, ne’ebé reklama liuhusi protestu veteran sira, tanba ne’e mak ami fó tempu ba sira atu halo reklamasaun bazeia ba artigu 18 estatutu kombatente libertasaun nasionál nian, ne’ebé dehan kombatente ne’ebé la satisfeitu ho rezultadu ne’ebé fó sai bele halo reklamasaun no rekursu, tanba ne’e mak fulan hirak ne’e hatama ona rihun 61 no daudaun ne’e kontinua verifika hira mak prenxe kritériu”, Sekretáriu Estadu Merak dehan ba TATOLI nia knaar fatin, ohin.
Nia esplika husi prosesu verifikasaun ne’e maka foin bele define veteranu nia grau kontribuisaun bá luta independénsia Timor-Leste nian.
“Ami sei haree ninia reklamasaun hira, kontestasaun hira, husi 4a7, 8a14, ba 15a19, no 20a24 ne’e hira. Ami sei haree selesiona hotu mak fó solusaun, ami seidauk bele taka sai asuntu ida ne’e, tanba loloos asuntu ne’e la rezolve husi ministériu, ministeiru apenas administra, ko’alia kona-ba polítika administrasaun maibé kompeténsia tomak ne’e iha kombatente libertasaun nasionál bazeia ba estatutu lei orgániku konsellu nian ne’ebé mosu iha 2018 iha 28 Marsu”, nia dehan.
Nia afirma publikasaun lista editál ida-ne’e tuir prazu legál durante fulan-tolu, sura hosi loron 15 fulan-Janeiru to’o loron 15 fulan-Marsu. Maske prazu ne’e remata ona, maibé iha reklamante balu maka ninia dokumentu ka dadus sira seidauk hetan assinatura hosi sira-nia testamuña.
Tanba ida-ne’e maka liuhosi alargada iha loron 17 fulan-Marsu liubá, ministériu ho konsellu administrasaun Konsellu Kombatente Libertasaun Nasionál (CCLN, sigla portugés) no komisáriu sira deside halo estensaun ba fulan-ida tán. Prazu fulan-ida ne’e hahú fila-fali hosi loron 18 fulan-Marsu to’o loron 17-fulan-Abríl.
Entretantu, tuir dadus veteranu rejistadu 2009 iha teritoriu nasionál hamutuk ema na’in-124.680.
Liuhosi konteúdu ne ebé mensiona iha estatutu kombatente libertasaun nasional, lei númeru 3/2006, no artigu 13 hateten rejistu kualidade hanesan kombatente libertasaun nasionál sei kontinua hala’o validasaun rejistu ba períodu daruak nian ba rekoñesimentu kombatente hanesan libertasaun nasionál neʼebé rejista iha tinan 2009.
Notísia relevante: MAKLN simu reklamasaun no kontestasaun liu rihun 42
Jornalista : Osória Marques
Editora : Rita Almeida
