IQTL, I.P sensibiliza dekretu-lei rua ba abitante Vikeke
VIKEKE, 05 Juñu 2025 (TATOLI)-Istituto Kualidade Timor Leste, Instituto Públiku (IQTL, I.P), kinta ne’e, sensibiliza dekretu-lei nú. 20/2023 no dekretu-lei nú. 40/2023 ba abitante sira munisípiu Vikeke.
Husi dekretu-lei nú. 20/2023, kona-ba rejime jerál meterolojia legál no dekretu-lei nú. 40/2023 kona-ba sistema unidade ba medida legál.
Iha sensiblizasaun ne’e Vogál III husi IQTL, I.P, Tolentino Fraga Guterres, haktuir IQTL, I.P sensiblizasaun ba asuntu metrólojia ne’ebé sai hanesan sasukat ida ba kuantidade nian, tanba ne’e sai importante ba nasaun Timor-Leste hodi garante ba atividade ekonómia, ne’ebé liuhusi sasukat sira-ne’ebé utiliza ba atividade tranzaksaun no kormérsiu nian.
“Tanba ne’e, iha tinan 2023 liuhsui Konsellu Ministru aprova dekretu-lei rua mak hanesan dekretu-lei nú. 20/2023 no dekretu-lei nú. 40/2023. Nune’e, ohin, ami mai halo sensibilizasaun iha munisípiu Vikeke, atu ita-nia autoridade, empreza no abitante sira bele komprende dekretu-lei sira-ne’e,” Tolentino Fraga Guterres hateten iha ámbitu abertura sensiblizasaun, iha salaun administrasaun Vikeke, ohin.
Tanba ne’e, nia dehan, estabelese dekretu-lei sira-ne’e tuir padraun internasionál kona-ba lala’ok oinsá bele garante komprensaun ezatidaun no transparante loloos ba mediasaun hotu ne’ebé utiliza ba komérisiu, indústria, sentifiku, teknólojia, sistema unidade no medida legál sira hanesan metru, kilógrama no sira seluktán.
“Nune’e parte jurídiku mak sei aprezenta dekretu lei referida. Atu ita-nia ba ambitante sira hodi komprende, tanba medida legál sira-ne’e sai importante ba ita bainhira ita halo produsaun ba esportasaun no importasaun,” nia dehan.
Nia hato’o agradesementu ba autoridade munisípiu Vikeke no setór preivada no setór públiku sira tanba bele kolabora ho IQTL, I.P hodi realiza sensiblizasaun ba dekretu-lei sira-ne’e.
Iha biban ne’e, Komandante Polísia Nasionál Timor Leste (PNTL) munisípiu Vikeke, Supertintedente Antonio Rego Fernande hato’o agradesementu ba IQTL, I.P tanba bele mai Vikeke hodi introdús dekretu-lei ba abitantehodi iha dixipliña tuir lei sira-ne’ebé iha.
“Tanba iha ita haree dasi ne’ebé tetu nahan sira iha merkadu lokál sira ita haree moos tetu nahan la to’o kilograma (kg)1000, maibé to’o ita tetu di’ak ne’e iha kilógrama 800. Maibé, ita-nia negosiante sira-ne’e dehan to’o kilograma 1000. No mós produtu sira seluk ne’ebé faan iha merkadu sira tanba ita ladun kontrolu ho di’ak. Entaun liuhusi dekretu lei sira-ne’e ita bele kontrola, atu ema labele viola,” nia hateten.
Iha fatin hanesan, Sekertáriu Munisipál Vikeke asutnu Planeamentu Investimentu Dezenvolvimentu Integradu, Acacio Sarmento, husu funsionáriu sira iha munisípiu Vikeke no empreza sira aproveita didi’ak hodi bele hatene lei sira-ne’ebé IQTL, I.P aprezenta iha Vikeke.
“Ha’u husu funsionáriu sira no emprezariu sira fó atensaun másimu ba sensiblizasaun ida-ne’e, hodi bele komprende dekretu-lei rua ne’ebé IQTL, I.P fahe ba ita,” nia dehan.
Partisipa iha sensiblizasaun ne’e hetan partisipa husi diretór munisipál, diretór territorial, funsionáriu, autoridade lokál, emprezáriu no estudante sira iha munisípiu Vikeke.
Jornalista : Vitorino Lopes da Costa
Editór : Cancio Ximenes
