DILI, 05 Juñu 2025 (TATOLI)—Ministru Negósiu Estranjeiru no Kooperasaun (MNEK), Bendito Freitas, realiza enkontru bilaterál ho nia omologa Ministra Estadu no Negósiu Estranjeiru (MNE) Komunidade São Tomé e Príncipe, Ilda Maria dos Santos Amado Vaz hodi ko’alia kona-ba kooperasaun bilaterál entre nasaun rua.
Kooperasaun bilaterál entre nasaun rua ko’alia liu kona-ba área edukasaun, tasi nomós iha kontestu Komunidade Nasaun Sira Ko’alia Lian Portugés (CPLP-sigla portugés) nian.
Enkontru ne’e hala’o iha Ministériu Negósiu Estranjeiru no Kooperasaun (MNEK) iha Abedia de Portugál, iha ámbitu vizita traballhu Ministra Estadu no Negósiu Estranjeiru Komunidade São Tomé e Príncipe, Ilda Maria dos Santos Amado Vaz, iha Timor-Leste hodi partisipa iha enkontru kona-ba “Países Africanos da Oficial Portuguêsa– Timor-Leste- PALOP-TL da-15 iha Dili.
“Ami ko’alia iha kontestu CPLP nian no ida iha kontestu bilaterál. Importante mós asuntu kona-ba tasi nian, tanba ita hanesan nasaun Timor-Leste ho São Tomé e Príncipe ita tama iha organizasaun (Small Island Development States–SIDS), ho ida-ne’e ita bele haree took polítika mapeamentu globál par reforsa no bele hetan objetivu partisipasaun mais ativa,” Ministru Bendito hateten bainhira remata reuniaun iha edifisiu MNEK Dili, kuarta (04/06).
Ministra Estadu no Negósiu Estranjeiru Komunidade São Tomé e Príncipe, Ilda Maria dos Santos Amado Vaz hateten, enkontru ne’e atu haree área kooperasaun ne’ebé nasaun rua ne’e bele dezenvolve hamutuk partikularmente iha área edukasaun no língua portugeza.
“Ami mós ko’alia kona-ba kooperasaun hodi konsidera ita-nia espesifisidade sira, oseanu, potensiál boot ne’ebé nia oferese, dezafiu sira hosi nasaun sira no oinsá ita bele uza ita-nia potensiál nu’udár forsa tantu iha ámbitu koordenasaun nian, diálogu polítiku no iha desizaun estratéjiku sira iha nível internasionál,” Ministra Ilda dehan.
Jornalista : Hortencios Sanchez
Editór : Cancio Ximenes
