SMAPPF Vikeke halo ona pedidu ba nasionál apoiu ai-moruk kombate peste karakól

VIKEKE, 09 Juñu 2025 (TATOLI)—Diretór Servisu Ministériu Agrikultura Peska, Pekuária no Floresta (SMAPPF) munisípiu Vikeke, Olivio Freitas Soares, informa 2025 SMAPPF Vikeke halo ona pedidu ba nasionál hodi apoia ai-moruk kombate peste karkol ba agrikultór sira iha munisípiu Vikeke.  

“Kona-ba ai-moruk ami hatama ona pedidu ba nasionál, hodi apoiu ai-moruk atu kombate peste ne’ebé estraga hare.   Ai-moruk tinan ida-ne’e sei iha prosesu konkursu públiku ne’ebé seidauk fornese mai munisípiu. Nune’e mós, ita-nia natar foin hahú halo, ha’u sente fulan oin ai-moruk tama ona no ita sei distribui ba ita-nia agrikultór sira,” Olivio Freitas Soares hateten ba Agência Tatoli, iha nia kna’ar fatin, Beloi, ohin.

 Daudaun ne’e, nia dehan, orienta ona estensionista sira hodi halo identifikasaun ba peste sira-ne’ebé atake ba komunidade sira-nia hare, nune’e bainhira ai-moruk to’o iha munisípiu ne’e labele distribui sala ai-moruk ne’e.

“Maske ai-moruk seidauk iha, maibé ha’u orienta ona ita-nia estensionista sira halo identifiklasaun ba peste. Atu nune’e, ita bele hatene peste ne’ebé atake ba hare,” nia dehan.

Tuir nia, iha tinan 2024, peste ne’ebé atake makaas ba hare mak peste karakól maibé iha tinan kotuk konsege revolve ona. Pestei karkól ne’e baibain tesi hare nia tahan no hamate hare lalais de’it.

“Tan ne’e, iha tinan ida-ne’e, ita husu ai-moruk hamutuk item 20 no husi ai-moruk sira-ne’e ba kulker peste ba hare no batar inklui mós ai-moruk kombate peste karakól rasik. Ha’u sente ba ai-moruk sira-ne’e sei sufisiente ba agrikultór sira,” nia hateten.

Nia dehan, SMAPPF Vikeke orienta ona agrikultura sira la’o tuir sistema agrikultura, nune’e SMAPPF halo atendementu hahú husi hala’i natar to’o kolleta hare.

“Nune’e, daudaun ne’e ita-nia estensionista sira kontinua akompaña agrikultór iha natar, hodi hasa’e produsaun hare iha munisípiu Vikeke,” nia hateten.

Jornalista : Vitorino Lopes da Costa

Editór        : Cancio Ximenes